Borja Valle realizou esta mañá o seu primeiro adestramento co grupo, neste caso cos futbolistas que onte non actuaron de inicio ante o Málaga CF. Desta forma, o dianteiro berciano entra na recta final da súa recuperación.
Para este grupo, hoxe cos fabrilistas Bicho e o meta Ricardo, houbo un quecemento, un circuíto físico con finalizacións e, para concluír, fútbol en espazo reducido, de alta intensidade.
Os titulares ante o Málaga (Dani Giménez, David Simón, Pablo Marí, Domingos Duarte, Saúl, Krohn-Dehli, Álex Bergantiños, Carles Gil, Carlos Fernández e Quique González) realizaron carreira continua, estiramentos e tarefas de recuperación no vestiario, con ximnasio e paso pola padiola dos fisioterapeutas.
Faltou Didier Moreno, xa de viaxe á concentración de Colombia. Vicente Gómez realizou tarefas de readaptación; e tiveron tratamento médico e de fisioterapia Fede Cartabia e Dubarbier.
Mañá martes, o cadro está citado de novo en Abegondo ás 11:00 horas.
