- Foto:@SeFutbol -
#ANOSACANTEIRA conta esta semana con presenza de 4 xogadores en diferentes categorías inferiores da selección española: Juan Rodríguez, Trilli, Hugo Novoa e Carlota.
Carlota gañou con España a final do Torneo do Atlántico
A xogadora do Deportivo ABANCA Carlota Sánchez participou coa selección española sub-17 no Torneo do Atlántico en Santa Cruz de Tenerife.
Deste xeito, Carlota seguiu os pasos dados con anterioridade por outras xogadoras deportivistas como Teresa Abelleira, Nuria Rábano e Malena Mieres, tamén internacionais en categorías inferiores.
Onte venres 18, España xogou a final do trofeo ante Canarias. Venceron as españolas (4-1), nun partido no que sobresaíu Carlota.
A futbolista branquiazul saltou ao campo no minuto 46 en substitución de Ona Baradad e coa súa presenza no céspede, a selección decantou o partido no seu favor.
España enfrontouse o pasado mércores a Eslovaquia nunha das semifinais.
As españolas superaron claramente (3-0) ao seu rival, nun partido no que destacou Carlota: gol maxistral de volea e asistencia. Foi relevada no minuto 64 por Ascensión Martínez.
Os resultados da selección foron os seguintes:
Semifinal
Mércores 16 de xaneiro
ESPAÑA 3 - ESLOVAQUIA 0
Final
Venres 18 de xaneiro
ESPAÑA 4 - CANARIAS 1
Todos os encontros tiveron lugar nas instalacións do Centro Insular de Atletismo.
Trilli e Hugo Novoa, á final hoxe da Aegean Cup en Turquía
O Deportivo achega dous futbolistas á selección española sub-16, que participa na Copa Aegean na cidade turca de Esmirna: os cadetes Trilli e Hugo Novoa.
España quedou encadrada no grupo B, con Rusia, Albania e Macedonia.
A selección española logrou a primeira praza do grupo B e, por conseguinte, a clasificación para a gran final, hoxe sábado ante a anfitrioa, Turquía (15:00 horas, 13:00 hora peninsular).
O pasado xoves 17, España impúxose (3-2) a Rusia no último encontro da Primeira Fase. Ibrahim Cámara -2- e Israel Salazar foron os goleadores españois. Hugo Novoa saltou ao campo no minuto 63 en substitución de Miguel Rodríguez; e Trilli esta vez seguiu o choque desde o banco.
O pasado martes, os españois, esta vez con Trilli e Hugo no once inicial, superaron (2-0) a Macedonia con tantos de Bruno Iglesias e Israel Salazar. Os dous canteiráns branquiazuis xogaron completo o encontro.
O primeiro rival da selección española sub-16 foi o pasado luns Albania, á que a 'rojita' derrotou (1-0), con gol de David Vilán.
Houbo tamén presenza deportivista, pero nesta ocasión na segunda metade. Trilli substituíu no minuto 61 a Rubén Iranzo; e Hugo Novoa saltou ao céspede no minuto 74 en substitución de Miguel Rodríguez.
O calendario de partidos da selección, todos nas instalacións de Altinordu FK Meti Oktay Tesisleri, é o seguinte:
Primeira Fase
Luns 14 de xaneiro
ESPAÑA 1 - ALBANIA 0
Martes 15 de xaneiro
ESPAÑA 2 - MACEDONIA 0
Xoves 17 de xaneiro
ESPAÑA 3 - RUSIA 2
Sábado 19 de xaneiro
Final
15:00 (13:00 hora peninsular): TURQUÍA - ESPAÑA
Juan Rodríguez xogou a segunda metade fronte a Italia coa sub-17
Juan Rodríguez Lima, que pertence ao cadro do Xuvenil B de Liga Nacional, foi citado pola selección española sub-17 para un amigable ante a poderosa Italia, subcampioa de Europa da categoría.
O choque disputouse o pasado mércores 16 de xaneiro no Estadio Fernando Torres de Fuenlabrada.
Os españois gañaron (1-0) e Juan Rodríguez xogou a segunda metade. Relevou a José Martínez no descanso.
