Derrota dun Deportivo que hoxe foi superado polo Valladolid

Con este resultado e os do resto da xornada de hoxe sábado, somos sétimos na clasificación con 42 puntos, igualados co sexto que é o Athletic Club. Por diante é quinto o Mallorca con 43, que mañá recibe ao Atlético de Madrid.

A baixa de última hora de Andrés Gardado a consecuencia dunha sobrecarga no sóleo da súa perna esquerda obrigou a Lotina a recompor o equipo. O que sen dúbida foi durante toda a primeira volta da liga unha das mellores bandas zurdas, con Filipe e Gardado, quedou polas lesións composta por un canteirán (Seoane) e un centrocampista (Juan Rodríguez) destros reconvertidos en zurdos. Ze Castro supliu no mediocentro a Antonio Tomás, Juan Domínguez situouse de interior dereito e por diante Valerón, Lassad e Adrián, este último como home máis adiantado.

O partido comezou cun Valladolid necesitado de puntos na clasificación lanzado a por o gol. Dos casteláns foi a primeira oportunidade, apenas no primeiro minuto de xogo. Fallo da defensa branquiazul, o balón cae a Borja quen, libre de marca, envía demasiado alto. A réplica branquiazul viño das botas de Juan Rodríguez, que xutou con moita intención tras unha boa xogada de todo o ataque deportivista. Xusto Villar despexa a saque de esquina.

Outra vez de Borja foi a segunda gran oportunidade valisoletana. Despois dun veloz contragolpe, o centrocampista trata de facer unha vaselina a Aranzubía que se foi lixeiramente desviado por encima do traveseiro. Na outra área, Colotto, un especialista no segundo pau, cabeceou un saque de esquina fóra por moi pouco. O partido estaba aberto e o gol podía chegar en calquera das dúas portarías.

No minuto 35, Do Forno cabeceou un saque de esquina ás mans de Aranzubía. Este saca o balón rápido, Adrián, en posición forzada, cede a Juan Domínguez, que habilita a Juan Rodríguez. O andaluz, con todo a favor e diante de Xusto Villar, perde unhas décimas de segundo que permite á defensa valisoletana impedir o seu remate.

Practicamente no minuto 40, de novo Colotto cabecea un córner ao segundo pau e o balón pégalle involuntariamente nas costas a Lopo cando podía dar un bo susto ao Valladolid. Foi a antesala do gol valisoletano, uns segundos despois. Nauzet, totalmente libre de marca, atópase cun balón na área despexada por Aranzubía e, de forte trallazo, logra o 0-1.

Ao descanso chegouse con vitoria provisional do Valladolid.

Na segunda parte, Lotina deixou no vestiario a Lassad e deu entrada a Pablo Álvarez para ocupar a banda dereita. Valerón actuou de mediapunta e Adrián, só en punta. O Valladolid saíu de novo mandón no terreo de xogo e fíxose coa pelota. De novo o perigo roldaba a área deportivista. Xusto Villar apenas pasaba apuros.

Co paso dos minutos, o Dépor seguiu sen presenza arriba. Lotina xogoulla con dúas puntas claros, Bodipo e Mista, que reaparecía tras a súa lesión de pube. Pero a tarde non era branquiazul. Pablo Álvarez, nun centro raso ao que non chega por pouco Bodipo, tivo na oportunidade máis clara do Deportivo na segunda metade. Xusto Villar, atento, atallou ben a pelota. Mendujanin, no desconto, pecha o partido cun tanto, o 0-2, que certificou o bo partido do Valladolid en Riazor.

Deportivo: Aranzubía, Manuel Pablo, Colotto, Lopo, Seoane, Zé Castro (Bodipo, m. 64), Juan Domínguez, Juan Rodríguez, Lassad (Pablo Álvarez, m. 46), Valerón (Mista, m. 64) e Adrián.

Valladolid: Xusto Villar, Pedro López, Sereno, Arzo, Do Forno, Borja (Medujanin, m. 75), Pelei, Nauzet, Marquitos (Canobbio, m. 66), Bo (Marcos, m. 85) e Diego Costa

Goles: 0-1, m. 39: Nauzet Alemán. 0-2, m. 91: Medujanin

Árbitro: Undiano Mallenco.
Incidencias: Antes do partido, o Consello de Administración do Deportivo expresou pola megafonía do Estadio o seu pesar polo falecemento estes días de Fernando Dumont, Directivo do Club desde 1974 a 1982; Manuela Sanjurjo, primeira Socio de Ouro feminina; e Antonio Germán Callón, pai de Jorge Callón, xogador do Cadete A de o Deportivo.