Sen pausa e case sen tempo para curar feridas, o Deportivo volveuse a adestrar esta mañá en Abegondo coa mente xa posta no vindeiro domingo 2 de outubro, coa visita do San Fernando CD Isleño (19:00 horas, TVG-2 e InSports.tv) a ABANCA-RIAZOR, en partido correspondente á 6ª xornada.
Co resultado de onte ante o CF Talavera de la Reina en partido aprazado da 1ª xornada, #OSNOSOS, xa cos mesmos partidos que o resto de rivais directos, suman 11 puntos e son cuartos na táboa, a 4 puntos do líder, o Córdoba CF, con pleno de vitorias até a data.
Roberto Olabe, na súa comparecencia ante os medios de comunicación esta mesma mañá, apuntou que o vestiario deportivista está "xa pensando neles", en referencia ao conxunto andaluz, próximo rival branquiazul.
O centrocampista vasco, que onte substituíu a última hora a Isi Gómez no once inicial, cualifica esta semana de "importante porque imos ter 3 partidos. Con ganas de empezar a traballar para chegar o mellor preparados ao partido".
Borja Jiménez dividiu ao seu cadro en dous grupos. Os titulares onte en ABANCA-RIAZOR tiveron sesión de recuperación, con carreira continua, estiramentos, ximnasio e fisioterapia. Algúns, caso de Mario Soriano, Quiles e Adrián Lapeña, con 2 partidos xogados en apenas 4 días, nin sequera saltaron ao céspede.
Os demais membros do cadro realizaron o habitual adestramento post-partido, cun quecemento, rondos, finalizacións e fútbol reducido.
David Mella, que acaba de regresar de disputar un torneo en Bursa (Turquía) coa selección española sub-18, no que acabou campioa, foi o representante esta mañá de #ANOSACANTEIRA.
Isi Gómez, á espera de probas médicas para coñecer o alcance exacto da súa lesión nun aductor que o apartou onte do once, tivo adestramento individualizado.
Mañá venres, o Dépor adestrarase de novo en Abegondo a partir das 10:30 horas.
