Ambiente de gala en Riazor para o Deportivo-Celta. Os afeccionados despregaron ao comezo do partido un mosaico branquiazul que rezaba un premonitorio "Depor Campión". Os deportivistas acudiron en masa a pesar do tempo, xa que non deixou de chover en todo o día na cidade herculina.
Con este ambiente de gala comezaba o encontro. Tras uns minutos iniciais nos que se sucederon os contragolpes dun e outro equipo, con xogo precipitado, ambos os conxuntos relaxáronse un pouco e xogaron máis o balón no centro do campo. O Deportivo fíxose co dominio en toda a primeira metade na que Víctor, Valerón e Turu, sobre todo, puxeron en aprietos a Pinto pero sen chegar a anotar. As xogadas de estratexia a balón parado do Deportivo non chegaron a frutificar e, para máis desatinos, un penalti de Yago sobre Tristán é lanzado polo Turu que, desequilibrado, dispara fóra. O Celta, pola súa banda, gozou neste período dun par de contragolpes pero sen chegar a disparar á porta de Molina. Catanha, o seu home máis adiantado, caeu en varios foses de xogo motivados polo adiantamento da defensa local.
No segundo período foi o Celta o que comezou presionando a meta rival, con varios disparos a porta, os primeiros dos célticos no partido. Mostovoi, Karpin e Doriva foron os encargados de pór en aprietos a Molina aínda que os deportivistas aproveitaron os contragolpes para buscar o gol. A entrada de Djalminha deu máis ideas ao ataque deportivista e os pases do brasileiro a Turu e Tristán deixaron sentados á defensa celeste. Con todo o gol non chegaba e houbo de ser o propio Djalma o encargado de mover o marcador cun gol de bandeira. Un pase longo de Tristán ao brasileiro no pico da área foi aproveitado por Djalminha para recortar de tacón ao defensa céltico e disparar un tiro imparable que batía a Pinto e suporía o primeiro e único gol do partido.
Desde ese instante o Deportivo pareceu conformarse co resultado e o Celta levou a iniciativa do ataque obrigando a Molina a esmerarse nas súas intervencións. Karpin, Mostovoi, Pablo e Doriva foron os encargados de levar o perigo céltico á área branquiazul. O Deportivo xogou desde ese momento ao contragolpe, buscando o desmarque de Makaay con balóns longos e este estivo a piques de marcar, cun balón do holandés que foi rexeitado polo poste cando Riazor xa cantaba un novo gol.
O Deportivo continúa empatado a puntos coa Valencia, que tamén superou o seu enfrontamento desta xornada, liderando a táboa de Primeira División. O Celta baixa á décima praza da clasificación e a próxima semana enfróntase ao Barça.
