O Deportivo sufriu unha dolorosa derrota na súa visita ao Stadium Gal de Irun, onde o Real Unión Club impúxose por 3-0.
Imanol Idiakez, adestrador deportivista, soamente realizou un cambio con respecto ao once inicial que bateu na pasada xornada ao entón líder, o Gimnàstic de Tarragona, en ABANCA-RIAZOR. Retu deixou o seu sitio no lateral esquerdo a Mikel Balenziaga.
O primeiro cuarto de encontro foi moi parello, aínda que con posesións máis longas dun Deportivo que apenas puido disparar a portería. O primeiro achegamento claro produciuse a balón parado, nunha cabezada alta de Pablo Vázquez a córner lanzado por Lucas desde a dereita do ataque coruñés. Corría o minuto 11.
A primeira acción perigosa do conxunto guipuscoano chegou no minuto 22, cando Pablo Martínez afastou o coiro despois de que se lle escapase das mans a Mackay, ao saltar a un centro de Joseca, após chocar no aire con Pablo Vázquez. Poucos segundos despois, Solís levou unha pelota entre Diego Villares e Salva Sevilla e, con todo o bordo da área despexado, sacou un dereitazo lonxe do alcance de Mackay co que adiantou ao seu equipo.
Co marcador en contra, o Deportivo non atopou reacción e o Real Unión viviu os seus mellores minutos. No 30, Alain Oyarzun lanzou directa unha falta escorada, buscando o pau máis afastado, onde chegou Mackay para rexeitar de puños. No 37, o propio extremo dereito local sacou un saque de esquina directo a portería que Mackay volveu desviar a córner. Xa en tempo engadido, a ocasión irundarra foi aínda máis clara, cando Antón Escobar rematou moi desviado, desde o punto de penalti e con Mackay fóra da súa portería, un servizo desde a esquerda de Alex Cerdá.
Nada máis comezar a segunda metade, no minuto 47, chegou o gol que noqueou aos branquiazuis. Paris Adot desviou un centro do ex deportivista Víctor Eimil que buscaba rematar Alex Cerdá no segundo pau. O balón golpeou no interior do pau dereito e introduciuse na portería de Mackay. Dous minutos despois, Antón Escobar perdoou o 3-0 nun man a man co porteiro coruñés que tirou fóra.
Os branquiazuis pareceron reaccionar durante uns minutos nos que Paris Adot puxo varios centros seguidos que non atoparon rematador e co disparo desde fóra da área, no minuto 52, de Jose Ángel, cuxo zurdazo perdeuse rozando o traveseiro golpeando de primeiras unha deixada atrás de Balenziaga.
Con todo, calquera opción de sacar algo positivo do Stadium Gal desvaneceuse pouco despois, cando Solís bateu case sen oposición a Mackay após unha cabalgada pola dereita de Alain Oyarzun, no minuto 55.
Mackay evitou o cuarto gol local no minuto 57, nun man a man con Antón Escobar, pouco antes de que Eimil derrubase dentro da área a Martín Ochoa, nunha acción na que o colexiado non sinalou o claro penalti.
O lóxico paso atrás da Real Unión non o aproveitou o Dépor, que chegou no minuto 64 nunha cabezada desviada de Davo a centro de Ximo Navarro e no 66 cun potente zurdazo de Lucas que desviou lixeiramente un defensor irundarra, ante o que Irazusta puxo os puños para rexeitar a saque de esquina.
Mackay volveu tapar, no minuto 81, un disparo de Solís tralo rexeite dun córner. Co choque sentenciado, Imanol Idiakez fixo debutar en partido oficial a outro compoñente de #ANOSACANTEIRA, o mediocentro Rubén López, deportivista desde 2019 cando se incorporou ao Cadete A procedente do SD Compostela.
Co Dépor con dez, lesionado Ximo Navarro e cos cambios esgotados, un erro na saída de balón desde atrás puxo en bandexa a Córdoba outra posibilidade de facer o 4-0, pero o seu disparo co exterior da zurda saíu rozando o poste esquerdo do portal coruñés.
O equipo branquiazul non perdía un partido por tres goles de diferenza desde hai case 20 meses, cando caeu en Badaxoz polo mesmo resultado que hoxe o 12 de marzo de 2022, na 27ª xornada de Primera Federación 2021-22. O Deportivo queda unha semana máis na metade da táboa, con 14 puntos despois de 11 xornadas.
Real Unión Club de Irún: Irazusta, Eimil, Antonio Montoro, Imanol Baz, Joseca, Rivero (Beobide, min. 69), Solís (Córdoba, min. 87), Vidorreta, Alain Oyarzun (Iván Pérez, min. 69), Antón Escobar (Peru, min. 78) e Alex Cerdá (Julio Martínez, min. 87).
RC Deportivo: Mackay, Paris Adot, Pablo Vázquez, Pablo Martínez, Balenziaga (Ximo Navarro, min. 59), Diego Villares (Davo, min. 59), Jose Ángel (Rubén López, min. 84), Salva Sevilla, Hugo Rama, Martín Ochoa (Pablo Valcarce, min. 59) e Lucas.
Goles: 1-0 Solís (min. 23); 2-0 Paris Adot, en propia meta (min. 47); 3-0 Solís (min. 55).
Árbitro: Álvaro López Parra (c. cántabro). Cartón amarelo a Pablo Vázquez (min. 42), Alex Cerdá (min. 74) e Pablo Valcarce (min. 90).
Incidencias: partido correspondente á 11ª xornada do grupo 1 de Primera Federación disputado no Stadium Gal.