Nunha primeira metade moi igualada, o Celta saltou ao campo a por todas e nos primeiros minutos de xogo foron varias as ocasións para os de Vigo, algunhas delas claras como un disparo ao traveseiro. Con todo, a medida que pasaban os minutos o Deportivo reapareceu no partido plantando cara aos celestes. A primeira parte finalizou sen goles e cos ánimos tranquilos. A tensión foi aumentando a medida que transcorrían os minutos da segunda parte. Irureta tivo que substituír a Donato, con molestias. Entrou no terreo de xogo Ramis. As ocasións sucedíanse para ambos os conxuntos así como os rozamentos entre os xogadores que foron en aumento co gol deportivista. O Celta non logrou converter ningunha das súas oportunidades de gol. O traveseiro e Songo'ou se encargaron de evitalo. Pero a fortuna si sorriu a Turu Flores que no minuto 23 da segunda metade marcaba o único tanto do encontro.
Turu foi substituído por Jokanovic e Fernando entrou en lugar de Víctor. A tensión aumentou ata a expulsión de Djalminha por dobre cartón amarelo no período de desconto. Con todo, a inferioridade numérica non variou o marcador.
En definitiva, un emocionante e disputado encontro no que o máis discutido foi a actuación arbitral. Ao final, o tres puntos quedan en Riazor polo que os de Irureta aumentan a súa vantaxe con respecto aos de Víctor Fernández, que xa están a 8 puntos.
Á espera de finalizar o resto dos encontros da xornada, o Deportivo continúa líder en solitario cunha cómoda vantaxe sobre o resto dos equipos.
