Irene Ferreras, adestradora do Deportivo ABANCA, subliñou este mediodía na sala de prensa de Abegondo que, despois do partido de Copa de la Reina do pasado mércores e do que se aveciña de liga o vindeiro domingo en Oviedo, "aspiramos a ser un equipo que teña a capacidade a nivel condicional e mental de poder competir se fai falta cada 3 días".
Rivais históricos no máis alto da xa extinta Segunda Nacional, a adestradora deportivista sostén que ante o Real Oviedo "non miramos máis aló do presente. Aos antecedentes e estas historias non lle damos moita importancia. Estamos a traballar e expondo o partido da mellor maneira, como cremos que é o mellor para poder levarnos os 3 puntos e non miramos máis aló diso".
Opina que as dúas goleadas do Deportivo ABANCA nesta pasada semana, con 4-0 ao Raio e 5-0 en Copa ao CD Parquesol, "sempre nos dá confianza porque materializar as situacións de gol sempre é bo, pero hai que rebaixar un pouquiño esa euforia porque probablemente enfronte teñamos o domingo un partido que non se vai a dar dunha maneira tan fácil, entre comiñas; que nos custe máis abrir o marcador".
Cualifica pois como "algo anecdótico" eses dous folgados marcadores cos que o equipo deportivista abriu a temporada: "Sabemos que os partidos que se nos van a presentar van ser máis competidos". Así pois, pide "non utilizar iso (os resultados) para levarnos á euforia, senón ter estabilidade, tranquilidade e pensar no seguinte paso".
Ante o seu primeiro encontro lonxe de Abegondo, Irene Ferreras está convencida que "o equipo vai responder ben. Estamos xa mentalizados do que nos imos a atopar, tanto polo rival como polas condicións do terreo de xogo. É a primeira saída. En todas é difícil puntuar, pero á vez é moi importante. Imos tentar facer o noso xogo, pero evidentemente adaptándonos ás condicións que neste caso son dun campo de céspede artificial, con menores dimensións. E iso é un hándicap ao que temos que saber responder".
Do último partido disputado, o de Copa de la Reina ante o CD Parquesol, "quitando algún ratiño, onde baixamos un pouco o ritmo, o resto estou contenta coa imaxe que deu o equipo. Mandábaselles unha mensaxe de que non era un partido para dosificarse, porque o equipo ten que afacerse a competir sempre ao máximo nivel, que é a fórmula que nos pode facer chegar lonxe ou estar arriba e non ser un equipo intermitente, que un partido si ou un non. As rapazas responderon", matiza.
A adestradora deportivista, ante este gran arranque de temporada, insiste en que "non sentimos esa euforia. Se cadra de portas para fóra é un bo comezo. Iniciar con bo pé un proxecto novo é moi positivo porque dáche esa confianza no que estamos a facer, pero é que vivimos do día a día. Nós xa nos esquecemos do Rayo fai moito e do Parquesol onte. Dúranos a vitoria e a derrota o mesmo, que é un día; e a partir de aí xa pensamos no seguinte paso. Creo que é a única maneira de poder ser un equipo mentalmente estable e de que non nos altere en exceso o resultado, dá igual que sexa a favor ou en contra. Temos que tentar seguir da mesma maneira e mellorando nosas pequenas cousas".
Preguntado por Aroa Guerra, explica que "agora está a ter oportunidades máis por banda, por un tema de ocupación de postos e de cadro. Ten que asumir unha situación difícil, que é a dunha canteirá que está a se asentar no primeiro equipo e que ten por diante tanto a Millene como a Carlota Suárez. Está a traballar moi ben. Eu sei que este período lle vai a vir moi ben como futbolista. Está a mellorar, está a dar pasos e imos tentar axudala para que estea á altura do que eu lle esixo, que é moito".
De Millene apunta que "para nós é unha xogadora vital. Vén dunhas semanas, fóra de non ter dinámica normal. Xa poder tela e que ademais materialice as ocasións e o que xera o equipo é o importante do fútbol".
Irene Ferreras márcase como obxectivo "contar cun cadro onde estean todas preparadas. Non é nada fácil porque vai haber situacións onde haberá desmotivación, onde se cadra algunha xogadora se vaia caendo, pero tentaremos coidalas a todas e traballar con todas por igual. Outra cousa é a decisión de quen xoga e quen non, pero traballamos e pómoslle agarimo e dedicación ao traballo que facemos con cada unha delas para que polo menos vaian sendo mellores futbolistas e cando teñan as súas oportunidades, poder render como se espera".