As tres xogadoras venezolanas do Deportivo ABANCA, Kika Moreno, Gaby García e Michelle Romero, foron convocadas polo seleccionador absoluto do seu país, José Catoya, para disputar dous encontros ante o combinado nacional de Paraguai neste parón ligueiro na Primeira Iberdrola.
Kika, Gaby e Michelle Romero incorporáronse hoxe martes á concentración que servirá para inaugurar o Centro Nacional de Alto Rendemento de Fútbol Feminino Evelio Hernández na localidade de San Felipe, no Estado Yaracuy.
As futbolistas do Dépor ABANCA estarán concentradas desde hoxe martes 1 ao mércores 9 de outubro. Os encontros ante Paraguai terán lugar o venres 4 (16:00 hora local, 21:00 horas na Coruña) e martes 8 (17:00 hora local, 22:00 horas na Coruña) no mesmo Centro de Alto Rendemento.
A convocatoria non afecta a ningún encontro do Deportivo ABANCA ao ser datas FIFA. O equipo branquiazul, trala histórica vitoria en Lezama do pasado domingo ante o Athletic Club, na que Gaby ademais anotou un dos tantos, recibirá a continuación en Abegondo ao Rayo Vallecano a fin de semana do 13 de outubro.
