Luis Miguel Cruz Hernández (Puerto de Santa María, Cádiz, 23 de maio de 2001), coñecido futbolísticamente como Luismi Cruz, foi presentado este mediodía como novo xogador do Dépor até xuño de 2029 con opción a ampliación.
Fernando Soriano destaca que pode xogar "en banda dereita ou na mediapunta. Mesmo tamén por banda esquerda. Creceu na canteira do Sevilla FC, pasou polo Barça B e CD Tenerife".
O Director de Fútbol branquiazul asegura que é un futbolista "de moitísimo talento, con bo un para un, con balón parado. Son condicións que necesitabamos para complementar esas zonas do campo".
Insiste en que a intención é "configurar un cadro o máis equilibrada posible, que che poida cubrir calquera eventualidade. Este ano hai un campionato do mundo sub-20. Vai haber convocatorias de xogadores e estar cubertos en todas as parcelas é importante, e con xogadores de máximo nivel máis tranquilos estaremos".
Pola súa banda, Luismi Cruz confesou que "era moi fácil vir ao Dépor. Ao Dépor non se lle pode dicir que non. Estou moi contento de estar aquí co proxecto que me presentaron, que é moi ambicioso, de ir partido a partido facendo as cousas ben".
O novo atacante deportivista apúntase a xogar "onde o míster decida. É verdade que nos últimos anos estou a xogar en banda dereita e un pouco na mediapunta pero hai que afacerse a todas as posicións. Hai rivalidade, pero unha rivalidade sa. Levámonos todos moi ben. Cantos máis xogadores de nivel haxa no cadro mellor para todos. Seguro que subimos o nivel e iso é mellor para nós e para o Dépor".
Desvela que ao acabar a temporada 2024-25 "empezaron os contactos. Fíxome moita ilusión que se puxesen en contacto comigo, co meu axente. Decidín vir aquí porque é un club histórico. Quería estar aquí. É un paso adiante na miña carreira e é o sitio idóneo para min".
Luismi Cruz recalca que "agora o importante é traballar ben, facer un bo grupo, unha boa piña, que todos vaiamos na mesma dirección. Iremos partido a partido".
Percibe "o entusiasmo en #ANOSAFORZA. Tentarei devolverllo da mellor maneira co meu traballo, co meu esforzo e deixándoo todo en cada partido".
Finalmente, considera "moi importante o apoio de #ANOSAFORZA como para todos os futbolistas. Vivino o ano pasado en contra e foi unha pasada. Estou moi contento que poida ser a miña afección".