Ao revés que pola mañá, cando só houbo ximnasio e vídeo, na sesión vespertina do Deportivo no campo 2 e 3 da Cidade Deportiva de Abegondo o balón foi o gran protagonista.
Tras un quecemento con xogos e uns rondos, Clarence Seedorf dispuxo tres tarefas fundamentais: un exercicio de posesión, un traballo táctico por grupos para defensores e atacantes; e, para concluír, partidos en espazo reducido.
Adestráronse os fabrilistas Mujaid, Diego Caballo e Edu Expósito; mentres que quedaron no vestiario os lesionados Fede Valverde, Fede Cartabia e Luisinho.
Mañá, o cadro está citado ás 12:30 horas no Estadio ABANCA-RIAZOR, para unha sesión fundamentalmente de recuperación, que terá lugar na Casa del Agua.
Antes, ás 9:30 horas, os futbolistas almorzarán xuntos no Hotel Meliá María Pita.
Mañá de ximnasio e vídeo para o primeiro equipo
O Deportivo realizou esta mañá un adestramento 'indoor', entre a sala de vídeo e o ximnasio da Cidade Deportiva de Abegondo.
Por liñas (defensas, centrocampistas e atacantes), Clarence Seedorf reuniuse cos seus futbolistas na sala de vídeo, mentres os preparadores físicos realizaban co resto un traballo preventivo e específico no ximnasio.
Faltou unicamente Bóveda, que estará uns días de permiso a consecuencia da súa lesión.
Pola tarde, o cadro está citado de novo ás 18:00 horas en Abegondo.
