Miguel Llorente alegrouse esta mañá en rolda de prensa en ABANCA-RIAZOR que, excepto Alba Merino, da que "estamos a esperar o resultado dalgunha proba médica", para o partido deste sábado 21 de maio ás 11:30 nas instalacións deportivas Tensi ante o Real Oviedo "temos a todas. Facía bastante tempo que non tiñamos todas dispoñibles".
O técnico deportivista asegura que "o cadro está ben. Onte fixemos unha actividade (de escape en The Rombo Code e unha comida en Sanbrandan Lunch) fóra de adestramento que serviu para estar máis tranquilas, desconectar un pouco desta mala dinámica que levamos xa tan tan longa".
Admite que "a temporada está a ser moi longa para nós e para todos os equipos. Falando con algún adestrador doutro equipo dime exactamente o mesmo. Estamos a desexar xogar en Oviedo. Estivemos recuperando sensacións que perderamos hai moito tempo. Os dous últimos partidos, a pesar dos resultados, a nivel de xogo son bos partidos e iso é o que nos vai a achegar á vitoria. Así debería ser, sendo recoñecibles e tendo unha identidade clara. E meter as que teñamos, que é o único que nos falta e é o máis importante; pero estamos a xerar, estamos a ter ocasións, son ocasións bastante claras e no momento que entren dous, a dinámica cambiará. Quédannos dous partidos, hai que gañar os dous e mirar resultados para ver se podemos saír do playout".
Do Real Oviedo, Miguel Llorente lembra a "rivalidade histórica" co Dépor ABANCA. Así pois, vaticina "un partido bastante disputado. Elas non é que non se xoguen nada que si que se xogan, pero a diferenza é un posto máis arriba, un posto máis abaixo, que en caso de playout depende do rival que che enfrontes. Vai ser un equipo que tamén me gustou sempre moito, con xogadoras de calidade, un equipo que se atreve, que che vén a buscar arriba, que non escatima en nada, que propoñen unha idea máis directa que a nosa, pero efectiva. Na segunda volta tamén sufriron algo parecido ao noso e do mesmo xeito que moitos outros equipos da parte alta da táboa perderon bastantes puntos, pero é o Oviedo. O ano pasado cando fun co FC Barcelona B non gañamos nin na ida nin na volta".
Tamén se refire ao choque desta temporada entre ambos os equipos: "O noso mellor partido da temporada foi contra elas en Abegondo, pero vai ser un equipo que vai saír a morder, atrevido, con moita calidade e a polos 3 puntos. Non queda outra e simplemente por amor propio e porque queren gañar como todos os equipos, vai ser un partido moi complicado".
Finalmente, recalca que para evitar o playout hai que gañar os dous partidos que restan (Real Oviedo e Atlético de Madrid B): "Non vale outra. Non sei se hai algunha outra conta. Se cadra se te pos con papel e boli podes rescatar algún punto máis, pero esas son as contas. Gañar dous partidos seguidos, tal e como estamos, sería unha dose de moral brutal. Mesmo gañar ao Oviedo vainos a dar unha dose de moral que nos vai a facer enfrontar ao Atlético de Madrid B moito máis fortes que se non. Á parte xa do playout, que obviamente agora mesmo si que temos que miralo. Hai 3 semanas dicía que non, pois me equivoquei, e agora mesmo si hai que miralo, porque o temos a tiro de pedra. Entón gañar a Oviedo si ou si e mirar o resultado do FC Barcelona B, que ten un partido importante contra CDF Osasuna; o partido de AEM, que ten un partido importantísimo contra Levante Las Planas... E a semana que vén volveremos falar. Aos poucos, como diría o Cholo Simeone, partido a partido e veremos a ver que pasa".
