Mohamed Bouldini (Casablanca, Marrocos, 27 de novembro de 1995) foi presentado esta mañá en Abegondo como novo xogador do Dépor até o 30 de xuño de 2028.
Acompañado por Antonio Méndez, adxunto á Dirección de Fútbol, o novo dianteiro deportivista pousou en primeiro lugar para os medios gráficos no campo principal coa súa camiseta branquiazul que xa estreou o pasado domingo en ABANCA-RIAZOR ante o Racing de Ferrol.
Xa na sala de prensa, asegurou estar "moi contento nestes primeiros días. Recibíronme moi ben. O equipo está moi ben e as sensacións son moi positivas".
Explica que a súa saída da UD Levante foi rápida: "Nun día ou dous pasou todo. Cando me chama o Dépor, un club histórico, cun proxecto novo... Gústame todo. Estou feliz".
A súa pretemporada co conxunto levantino foi "moi boa. Tiven ofertas de fóra pero preferín quedarme na UD Levante. Cando me sae o Dépor, falei con Fernando Soriano, explicoume todo. Cando vénche un equipo grande como o Dépor, coas ideas claras como tiña, decidiuno nun día e saíu todo ben". "Foi sincero (Fernando Soriano), falamos de todo, o obxectivo do equipo... Díxome: 'necesitamos un dianteiro como ti, que poida axudar tamén ao equipo, darlle outras virtudes'. Convénceme rápido e decidín vir", engade.
Preguntado polo obxectivo do Dépor, pensa como Imanol Idiakez en ir "partido a partido: Gañar cada partido, loitar e por aí imos crecer".
Insiste en que chega para "axudar. Son un máis. Estou no barco co equipo. O que me pidan vou facelo. Vou tentar marcar goles, esforzarme en cada adestramento, mellorar e dar un plus ao equipo".
Sente cómodo "co que diga o míster. Imos xogar, a loitar, se xogo só, se xogo con 2 eu igual. Fágoo todo polo equipo".
Sobre as súas cifras goleadoras, lembra que a temporada pasada "puiden facer moitos goles pero anuláronme moitos, 8 ou 9. Espero este ano facer máis e que salga todo ben".
Do partido ante o Granada CF deste sábado 7 de setembro no Nuevo Los Cármenes (16:15, LaLiga Hypermotion), opina que "é un partido moi complicado contra un dos equipos que poden subir. É un equipo moi forte sobre todo en casa".