Pedro Mosquera e Carlos Fernández puxeron un brillante colofón esta tarde á 20 edición do DéporCampus Mauro Silva, que se desenvolveu esta semana Santa nas instalacións do INEF de Bastiagueiro.
O mediocentro coruñés e o dianteiro sevillano colleron a substitución de Vicente Gómez e Vítor Silva, protagonistas onte martes; e de Yamamoto, Alba Merino e Teresa Abelleira, convidadas o pasado luns.
A tarde arrincou, como é tradicional, coa protocolaria foto de familia, un recordo que moitos dos nenos e nenas conservarán na memoria toda a súa vida, axudados polas cámaras dos teléfonos móbiles das súas familias.
A continuación, os futbolistas branquiazuis, acompañados por Roberto Taibo, director do DéporCampus Mauro Silva, sometéronse no salón de actos á sempre divertida quenda de preguntas a cargo dos nenos e nenas, esta vez con moitos dos pais asistentes tamén a unha inusual rolda de prensa.
A choiva non rebaixou nadiña de nada as emocións tanto dos 80 nenos e nenas participantes como dos dous invitados, especialmente Pedro Mosquera, que confesou aos presentes que o seu gran ídolo futbolístico é precisamente Mauro Silva, un dos grandes capitáns que tivo o Dépor ao longo de toda a súa historia.
Sen dúbida, o xenial centrocampista brasileiro é todo un referente para varias xeracións de coruñeses e de deportivistas que, como Pedro Mosquera, soñaron desde nenos con defender a camiseta do Real Club Deportivo.
Soño que acaba ás veces en pesadelo: "O peor do fútbol é baixar a Segunda, e máis sendo de aquí", di o centrocampista coruñés, ansioso por celebrar un ascenso co Dépor, porque "é unha alegría enorme".
Pedro Mosquera explicou a pequechos a súa traxectoria deportiva, que arrincou no seu colexio, a Santa María del Mar, e continuou no Galicia Gaiteira da Coruña, xusto antes de defender como alevín a camiseta do Dépor no torneo da Fundación El Larguero de Brunete.
Pola súa banda, Carlos Fernández desvelou que foi o seu avó o que lle inculcou a súa paixón polo fútbol: "Regaloume un balón cando era pequeno". O sevillano conta que, ademais do equipo do seu pobo, Castilleja de Guzmán, a súa carreira desde os 8 anos desenvolveuse no Sevilla FC, club ao que pertence. Iso si, guiña un ollo ao Dépor ante o aplauso da sala: "Oxalá poida seguir aquí o ano que vén".
A firma de postais, camisetas, pantalóns, zapatillas, balóns... puxo o punto e final á participación dos dous deportivistas na presente edición do DéporCampus Mauro Silva.
A Fundación Real Club Deportivo organiza actividades sempre que os máis pequenos están de vacacións. É o caso dos DéporCampus Cabreiroá e, nesta semana santa, xunto á Universidade dá Coruña, tamén do DéporCampus Mauro Silva. Entre as actividades de Ordes, Dumbría e o INEF de Bastiagueiro, 150 nenas e nenos viviron dunha forma diferente este tres días antes dos festivos.
