A alcaldesa da Coruña, Inés Rey, e o presidente do RC Deportivo, Juan Carlos Escotet Rodríguez, anunciaron este luns 16 de marzo un acordo entre o Concello e os accionistas maioritarios do RC Deportivo para impulsar conxuntamente a modernización integral do Complexo Deportivo de Riazor, que inclúe o estadio municipal, o Palacio dos Deportes, a Torre de Marathón e o conxunto de infraestruturas deportivas da súa contorna.
Este acordo marca o inicio dunha nova etapa de entendemento institucional e cooperación público-privada co obxectivo de reforzar o papel do deporte como motor social, económico e de proxección para a cidade.
A alcaldesa destacou que a decisión responde a unha visión estratéxica de cidade: "Hoxe selamos unha alianza pensando no mellor para A Coruña, para o Deportivo e para o futuro do deporte na nosa cidade. Este proxecto permitirá mellorar as nosas infraestruturas deportivas e estará pensado para o club, para a súa afección e para toda a cidadanía".
Pola súa banda, o presidente do RC Deportivo, Juan Carlos Escotet Rodríguez, subliñou que a iniciativa nace cunha vocación de longo prazo e cunha visión que transcende o propio uso deportivo do recinto.
"O proxecto que iniciamos non busca unicamente cumprir con requisitos externos ou temporais; pretende evolucionar o estadio e a súa contorna para integralos plenamente na vida diaria da cidade. Queremos un espazo vivo os 365 días do ano, capaz de xerar actividade deportiva, social e cultural que achegue valor á Coruña e a todos os coruñeses", subliñou.
O proxecto contará tamén coa implicación da Deputación Provincial, que colaborará no desenvolvemento dunhas instalacións acordes coa relevancia deportiva e social que o complexo de Riazor representa para a cidade e para Galicia.
Neste contexto, a alcaldesa explicou que o acordo é froito dun proceso de diálogo construtivo entre as institucións, orientado a atopar a mellor solución para os intereses da cidade. "Froito dese diálogo tomamos unha decisión responsable: renunciar a continuar coa candidatura do Mundial e concentrar os nosos esforzos nun proxecto propio para A Coruña", apuntou Inés Rey.
Así mesmo, o presidente do RC Deportivo reiterou o compromiso dos accionistas maioritarios co crecemento do Club e co desenvolvemento da cidade.
"Como accionistas maioritarios, queremos reafirmar o noso compromiso firme e a longo prazo co investimento no RC Deportivo e co desenvolvemento do Complexo de Riazor. Entendemos a nosa presenza na Coruña como unha aposta polo crecemento da cidade. O obxectivo é consolidar unha institución sólida, que actúe como motor de dinamización e que proxecte o nome da Coruña con rigor e profesionalidade, dentro e fóra das nosas fronteiras", apuntou.
Con este acordo, o Concello e o RC Deportivo establecen un marco de colaboración estable que permitirá avanzar na mellora das infraestruturas deportivas da cidade e consolidar o papel do deporte como un dos grandes activos da Coruña.
