O partido empezou cunha variación forzosa no once deportivista. Lopo non superou a súa lumbalxia e deixou o seu sitio no centro da zaga a Aythami, que se estreaba como titular en Liga. Esta circunstancia motivou que Adrián López, o central fabrilista, sentase no banco. Xisco e Filipe foron os sacrificados da lista inicial de vinte futbolistas que Lotina concentrou onte martes no Hotel Hesperia Finisterre. E unha segunda variación técnica respecto ao choque de Xetafe: Verdú ao banco e saltou ao campo de inicio Sebastián Taborda, xa recuperado.
Arrincou ben o Dépor, movendo con soltura a pelota. O Recre, ben acazapado na súa área, tiña algún que outro problema pola rapidez con circulábaa o coiro. Ao cuarto de hora, na primeira gran xogada trenzada do equipo onubense, e tras varios rexeites e un tiro ao pau, Cáceres lograba o 0-1. Nesta acción defensiva demostrouse que o Deportivo hoxe non estaba fresco. Tras este tanto viñeron minutos de desconcerto que aproveitou o Recreativo para deixar pasar tranquilamente os minutos. As bandas, sobre todo a esquerda, deixaron de funcionar. E Taborda apenas tivo oportunidades. Só Riki, que o tentou por todos os bandos, acertou a levar algo de perigo por exemplo cun centro chute que despexou a meta Sorrentino. Avanzou un paso máis o equipo branquiazul, pero sen chegar con perigo.
Ao comezar a segunda metade, o Deportivo encaixou un severo golpe co 0-2 obra de Javi Guerreiro, un futbolista que sempre marca en Riazor. Lotina xógase o todo polo todo. Adrián, Bodipo e Verdú, dous dianteiros e un centrocampista con marcado carácter ofensivo, substituíron a Juan Rodríguez, Lafita e Taborda. Houbo xa un claro dominador posicional, o Deportivo, que ben puido recortar distancias con remates de cabeza claros que non acertaron a ver portaría. Caso de Juan Rodríguez, Barragán... Nun deles, Adrián cabeceou á escuadra e Sorrentino salvou ao seu equipo dun gol xa cantado. O partido seguro que cambiase.
Ao final, 0-2 en Riazor. Segunda derrota do Deportivo na liga, curiosamente as dúas en Riazor e ante equipos andaluces. O domingo espera o Espanyol en Montjuic ao cinco da tarde.
