O Dépor domina primeiro, sofre despois, pero saca tres puntos que o achegan ao liderado

Oltra apostou polo once inicial que empatou ante o Valladolid o pasado domingo e derrotou hai 15 días ao Almería en Riazor. En fronte, un Numancia con dúas caras coñecidas, os coruñeses Nano e Xullo Álvarez, este con unha mascara para protexer o seu tabique nasal fracturado.

A primeira parte resultou igualada ata que o Dépor rompeu a muralla soriana. O equipo deportivista saltou enchufado e puido marcar cando nin aínda pasaran trinta segundos do comezo. O gol chegou nunha combinación entre Bruno Gama, Valerón e Lassad, que deixa a este só ante a meta numantino e fusílao a pracer. Antes, Nano puido adiantar ao seu equipo, pero o seu cabezazo foise ao traveseiro, axudado polo despexe de Aranzubia.

O Dépor atopou outra vez o camiño a portaría. Non en balde, é un dos equipos máis goleadores da liga Adiante. Así, Gardado, tras unha boa xogada esta vez pola banda esquerda, recolle un mal despexe do Numancia para golpear raso e axustado ao pau lonxe do alcance da meta Eduardo. Un 2-0 que tranquilizaba á bancada e co que se chegou ao descanso.

Tras a continuación, o partido seguiu coa mesma tónica: dominio branquiazul do xogo, cun Numancia que apenas inquietaba a meta deportivista. Valerón tivo nas súas botas o terceiro que poría o punto e final ao choque. Bruno Gama desborda aos dous defensores que o tapaban, mete un pase da morte ao canario, quen, libre de marca, trata de colocar o esférico raso lonxe do alcance do porteiro Eduardo. Foise fóra por pouco.

Advertira Oltra do perigo do Numancia, un equipo que viña en refacho e que ademais é o típico equipo da categoría: ten as cousas claras e sabe aproveitar o seu momento. Unha falta lateral é convertida por Juanjo no 2-1. Era o momento visitante.

O Dépor perdeu aí o control do partido, ata que noutra xogada imprecisa, Ze Castro fai penalti cando un rival encaraba a Aranzubia. Xullo Álvarez, quizais despistado polos Riazor Blues que tiña enfronte, envía o balón demasiado alto.

Escapouse a oportunidade do Numancia e o Deportivo non concedeu unha segunda. Juan Domínguez, cada vez máis acertado de face ao gol, aproveita un gran pase de Alex entre liñas para facer o 3-1.

Final do partido entre suspiros de alivio; e o Deportivo empolícase todo o máis alto.

Deportivo da Coruña: Aranzubia; Laure, Colotto, Zé Castro, Ayoze; Alex Bergantiños, Juan Domínguez (Aythami, m. 88); Bruno Gama, Valerón (Borja, m. 60), Gardado; e Lassad (Riki, m. 73).

Numancia: Eduardo; Unai, Jaio, Pavón, Ripa; Nagore, Gorka Larrea (Lago Junior, m. 76); Cedric (Neto, m. 72), Xullo Alvarez, Nano (Bedoya, m. 76); e Juanjo.

Goles: 1-0, m.15: Lassad; 2-0, m. 34: Gardado; 2-1, m. 62: Juanjo; 3-1, m. 86: Juan Domínguez.

Arbitro: Miranda Torres (Comité Catalán). Mostrou amarela a Bruno Gama, Zé Castro e Ayoze, por parte do Deportivo.