O RC Deportivo, representado polo seu conselleiro Benito Couceiro, fixo entrega na sede da Asociación Española Contra o Cancro (AECC) na Coruña das dúas camisetas do Dépor asinadas por xogadores e xogadoras do club aos gañadores da poxa a favor da Asociación organizada durante o Día Mundial Contra o Cancro de Mama.
Con esta iniciativa, a Asociación recada fondos que serven para continuar co seu labor solidario de prevención e de atención a pacientes e familiares, manter os seus servizos gratuítos _entre os que se atopan atención psicolóxica e social, logopedia, fisioterapia ou nutrición_, e contribuír a impulsar a investigación contra o cancro para alcanzar un dos seus grandes obxectivos: superar o 70 % de supervivencia no ano 2030.
No acto, ademais de Benito Couceiro, estivo presente Carlos Lamora, vicepresidente da Asociación Española Contra o Cancro na provincia da Coruña, xunto aos dous gañadores da poxa, ambos con vínculos familiares con pacientes oncolóxicos, o que lles impulsou a apoiar esta iniciativa.
Carlos Lamora agradeceu tanto a colaboración do RC Deportivo como a contribución económica e solidariedade dos dous gañadores da poxa: "Xestos como estes e o apoio da cidadanía axúdannos a seguir avanzando e a contar cada vez con máis ferramentas para facer fronte ao cancro. É fundamental divulgar todas as implicacións da enfermidade para seguir creando conciencia e conseguir a unión de toda a sociedade. Grazas a iso, e co esforzo dos nosos voluntarios, socios e profesionais e o traballo dos investigadores, podemos soñar cun futuro sen cancro".
