O Dépor Genuine desprazouse a Bilbao con motivo da gran final de LaLiga Genuine. O Athletic Club foi o encargado de recibir a toda a gran familia Genuine na súa Cidade Deportiva de Lezama, onde se disputaron os últimos e máis emocionantes encontros da edición.
Valencia CF, FC Cartagena e UD Almería enfrontáronse aos deportivistas.
Este domingo 1 de xuño o Dépor Genuine concluíu LaLiga Genuine 2024-25 e, ao cabo, a temporada cun último partido ante a UD Almería.
Venceron os andaluces por 1-3 aínda que Os Nosos seguiron á perfección as indicacións dun dos seus preparadores, Carlos García, na charla previa: "É o último da temporada mozos. O que me quede, hai que polo aí".
Os branquiazuis tiveron o sábado 31 de maio un día atarefado con dous partidos, ante os valencianistas (1-3) e cartageneros (0-2).
LaLiga Genuine 2024-25 é unha competición de fútbol desenvolvida por LaLiga, a través da súa Fundación, e pioneira en promover a integración de persoas con discapacidade intelectual na sociedade a través do fútbol.
Fomenta a igualdade, a tolerancia e o respecto mediante a forza do fútbol, pero tamén mediante programas de inclusión sociolaboral e de apoio á formación dos seus integrantes.
Intégrana 47 equipos procedentes de toda a xeografía española, con algo máis de 1.200 xogadores e xogadoras; e asentada como un referente no deporte inclusivo e unha celebración da diversidade.
Os equipos quedaron divididos en 2 grupos baixo os nomes de Compañeirismo e Respecto, dos que saíron dous campións deportivos (Fundació Barça e Villarreal CF) e dous de fair play (Burgos CF e Málaga CF).
Os resultados do Dépor Genuine en Lezama foron os seguintes
Sábado 31 de maio
DÉPOR GENUINE 1 - VALENCIA CF 3
DÉPOR GENUINE 0 - FC CARTAGENA 2
Domingo 1 de xuño
DÉPOR GENUINE 1 - UD ALMERÍA 3
Anteriormente LaLiga Genuine pasou por Tarragona, co Nàstic como club anfitrión, o pasado mes de novembro de 2024; por Abegondo e Paterna, dividida a comunidade Genuine en 2 grupos, na segunda fase disputada en marzo; e por Burgos, na Cidade Deportiva do Burgos CF.
