A Facultade de Psicoloxía da Universidade de Santiago de Compostela (USC), atendendo ao Proxecto de Actividades Culturais promovido desde o reitorado, organizou hoxe unha “Gala Deportiva e Cultural" composta de tres partes con distintas actividades.
A primeira foi o xantar de 14:00 a 15:00, que reuniu ao alumnado e ao profesorado para comer acompañados de música e mesas informativas sobre outras actividades e temas de interese. A continuación, de 15:00 a 16:00 tivo lugar un torneo de brilé entre todas e todos os participantes, pasando de 16:00 a 17:30 a xogar partidos de fútbol co Dépor Genuine como convidado. A xornada de actividades finalizou de 18:00 a 20:00, co I GOT Talent da Facultade de Psicoloxía, onde alumnado e profesorado fixeron distintas actuacións mostrando os seus talentos e habilidades antes de pór o punto final coa entrega de premios para os gañadores das actividades e outra entrega de premios a deportistas destacados do Grao en Psicoloxía.
Deste xeito, o Dépor Genuine segue participando en actividades deportivas e sociais de todo tipo que promoven a integración a través do deporte en todos os ámbitos, neste caso no universitario, cunha xornada de competición diferente ás habituais.
