O Dépor sobreponse ao Athletic e á gastroenterite e logra un empate

Miguel Anxo Lotina despexou as súas dúbidas polas baixas obrigadas no once inicial con Juan Rodríguez na banda dereita en lugar do lesionado Cristian e, como estaba cantado, con Barragán polo lateral destro e Manuel Pablo no zurdo ocupando o lugar do sancionado Filipe. O resto, os de sempre.

O primeiro tempo foi o que se esperaba, un duelo de poder a poder con escasas ocasións de gol. Puido adiantarse o Athletic cun chutazo que se estrelou no pau da portaría de Aouate. Si cobrou vantaxe o cadro vasco cunha acción de mala fortuna. Tras un centro pola esquerda, o balón chégalle por arriba a Barragán, que decide cederlle de cabeza o balón ao porteiro, sen contar que este estaba lixeiramente adiantado, co que a cesión se converteu nunha perfecta vaselina que significaba o 1-0 ao bordo da media hora de xogo.

Non era a tarde do Deportivo, máis espeso que nos últimos partidos, quizais tamén motivado á forte presión do Athletic. Só Gardado, cun lanzamento de falta demasiado alto, levou a intranquilidade á bancada de San Mamés. Cinco minutos antes, Xisco, un dos grandes damnificados pola gastroenterite, non puido aguantar máis e viuse obrigado a pedir o cambio.

Tras o descanso chegou o segundo tanto bilbaíno. Un balón que recolle David López sorprende a Manuel Pablo no segundo pau e remáchao á rede con algo de fortuna, pois o seu control saíulle orientado á área pequena, co espazo suficiente para adiantarse a Dudu Aouate. Lotina viuse obrigado a sacar a artillaría. Barragán por Taborda e Riki por Juan Rodríguez, tamén con molestias estomacais. De Guzman mostrou a súa versatilidade e ocupou con acerto o lateral destro. Riki situouse na esquerda, Gardado na dereita, Verdú e Sergio de medios centros e Taborda e Bodipo como puntas de lanza. Unha falta cometida sobre Bodipo que Riki coloca na escuadra no minuto 62 devolvía a esperanza ao equipo deportivista. O Athletic, aínda que seguiu contragolpeando con perigo, deixou o campo e o balón a un Dépor que se atopa máis cómodo, aínda que non teña o seu día, co balón nos pés e ademais fai gala dun pulo e unha fe fóra de toda dúbida. Puido lograr o empate Taborda, que non foi capaz de rematar unha deixada de Bodipo na área branquivermella. Cando todo parecía abocado á derrota, apareceu Gardado pola dereita, que centrou un balón blandito á área, xusto onde Aranzubía non podía chegar. Taborda aprovéitase da súa altura e peitea o balón ao segundo pau facendo o empate. Un gol que dá un punto de ouro _nunca se sabe se fundamental no golaverage particular_ e premia a fe, o pulo e a valentía do Deportivo, que acabou o partido con cinco futbolistas de clara vocación ofensiva.

O equipo acaba a xornada décimo sexto na clasificación, cun punto por encima do descenso, pero inmerso nun pelotón de equipos en apenas dous puntos. Por exemplo, o Sevilla, con 15 puntos, é undécimo. Agora, toca gañar en Riazor ao Atlético Osasuna.