O Deportivo empatou sen goles no Cerro del Espino ante o CF Rayo Majadahonda un partido no que mandou de principio a fin, con escasa profundidade na primeira metade e cunha segunda metade de permanente acoso que non atopou o premio que merecesen os seus esforzos, os tres puntos.
Borja Jiménez, técnico deportivista, realizou cinco cambios con respecto ao once inicial da pasada fin de semana fronte ao San Fernando CD Isleño en ABANCA-RIAZOR. O indisposto Mackay e o 'tocado' Jaime deixaron o seu sitio a Edu Sousa –que realizou o seu debut co primeiro equipo unha década despois de saír do Fabril após formar parte de #ANOSACANTEIRA durante cinco campañas– e Pablo Martínez, mentres que Álex Bergantiños, Olabe e Santamaría foron substituídos por Raúl Carnero, Quiles e Kuki Zalazar.
A primeira metade deixou un dominio infrutuoso da posesión para o conxunto deportivista, que apenas puxo en aprietos ao ex brancoazul Lucho García nun par de accións.
A máis clara chegou no minuto 9. Un duro disparo desde fóra da área de Kuki Zalazar rozou lixeiramente nun defensa e saíu preto do pau dereito, nunha acción na que sorprendentemente o colexiado non sinalou córner.
O equipo majariego, en cuxo banco debutaba a lenda deportivista Alfredo Santaelena, só tivo unha oportunidade, pero que oportunidade. No minuto 42, un pase interceptado a Antoñito en campo contrario provocou un veloz contrataque conducido por David Rodríguez, cuxo disparo cruzado atopouse co pé dereito de Edu Sousa para evitar o tanto.
A segunda metade xa foi outra cousa. Mesmo control herculino pero moita maior profundidade. As oportunidades empezaron a sucederse.
No minuto 49, Zalazar probouno desde a frontal da área cun lanzamento raso que atrapou Lucho García. O porteiro colombiano viu como no minuto 54 o balón case se coaba na súa portería, cando Rubén Díez enganchou un balón solto a 25 metros do marco e o seu dereitazo foise lambendo o recanto esquerdo.
A mellor ocasión local na segunda metade chegou no minuto 56 e a balón parado. Unha cabezada picada de Rafa Salama nunha falta colgada á área herculina que contivo sen problemas Edu Sousa.
Zalazar cabeceou desviado un centro de Antoñito no minuto 58, pouco antes de acariñar o gol nunha nova cabezada. No minuto 69, o hispano-uruguaio rematou ao pau dereito do portal majariego un fantástico centro pasado de Rubén Díez.
O acoso deportivista era total. Poucos segundos despois, Ibai, nada máis entrar ao terreo de xogo por Víctor Narro, empalmou coa súa bota esquerda unha volea no rexeite dun córner. A pelota foise moi preto do pau esquerdo.
Tamén houbo tempo para a polémica. Unha acción embarullada na área con varios remates rexeitados acabou coa pelota impactando no brazo de Konaté. O colexiado non castigou a acción, replicando ás protestas do hoxe capitán Diego Villares que efectivamente o balón golpeara a man do futbolista majariego pero que a tiña pegada ao corpo. Corría o minuto 75.
Nos instantes finais adquiriu protagonismo Yeremay. O canario, que substituíu a Quiles, viu como Lucho García sacáballe un dereitazo que ía directo ao recanto no minuto 85. No segundo minuto de engadido, unha acción coral do ataque deportivista acabou cun disparo de Yeremay desde a media lúa que golpeou nun adversario e foise lambendo o poste esquerdo. Nese córner, Lapeña deixou de cabeza o balón a pé de Yeremay na área pequena e de novo Lucho García evitou o tanto con outra gran intervención.
A última xogada do partido estivo a piques de dar os tres puntos ao Dépor. Un perfecto centro de Raúl Carnero ao punto de penalti cabeceouno Santamaría, pero o coiro perdeuse moi preto do pau esquerdo da portería majariega. Inmediatamente, o colexiado indicou o final do partido.
Con este empate, os branquiazuis suman 12 puntos despois de 7 xornadas, continuando na zona de playoff a pesar de sumar soamente 1 dos últimos 6 puntos en xogo e non ver portería desde hai 214 minutos.
CF Rayo Majadahonda: Lucho García, Aldalur, Ofoli, Casado, Dani Pinillos, Salama, Mario (Sergio Llamas, min. 86), Alayeto, Néstor Albiach (Konaté, min. 64), Nando (Guille Donoso, min. 76) e David Rodríguez (Solomon, min. 76).
RC Deportivo: Edu Sousa, Antoñito, Lapeña, Martínez, Raúl Carnero, Diego Villares (Olabe, min. 83), Rubén Díez, Quiles (Yeremay, min. 75), Mario Soriano, Víctor Narro (Ibai, min. 69) e Zalazar (Santamaría, min. 75).
Árbitro: Etayo Herrera (c. vasco). Cartón amarelo a Nando (min. 18) e Rubén Díez (min. 87).
Incidencias: partido da 7ª xornada do Grupo 1 de Primera Federación disputado no Cerro del Espino ante uns 2.000 espectadores, con maioría deportivista nas bancadas.
