Lotina introduciu varios cambios respecto ao once inicial da primeira semifinal ante a Cruz Azul. Iso si, o técnico vasco mantívose fiel ao seu esquema de catro traseiros, Laure, Lopo, Adrián López e Filipe, dous medioscentros, Antonio Tomás e Sergio, tres homes máis adiantados, Verdú, Valerón e Pablo Álvarez, e un dianteiro nato, o ex branquivermello Mista.
Saíu o Dépor con máis ritmo ao partido. Con fútbol combinativo e rápido, ao oito minutos, Valerón é derrubado con claridade na área pequena. Sergio converte o 1-0. Puido empatar o Atlético aos 15 minutos nun dos poucos descoidos da zaga branquiazul. Sinama quedou só diante do porteiro e sacou Aranzubia ben co corpo.
O partido tiña cor branquiazul, pero houbo que esperar ao minuto 37 para que Sergio, en colaboración cun defensor e de tiro afastado, lograse o 2-0 máis que merecido. Dous minutos máis tarde, Mista puido lograr o 3-0 ao quedar só ante Leo Franco, pero a meta arxentino aguantou de pé e abortou a clara oportunidade.
Máis claro foi no minuto 45, cando Teixeira Vitienes sinala outro novo penalti a favor do Deportivo por unha man clara Pablo cando Mista se aprestaba a rematar a Leo Franco na área pequena. Mista escorregouse ao lanzar o penalti e o balón fóiselle alto.
Xa no desconto desta primeira metade, o Atlético enganchouse milagrosamente ao partido ao cabecear Abreu á rede o saque dunha falta. O central colchoneiro impúxose no salto a Valerón.
Ao descanso 2-1 a favor do Dépor e claro dominio nas estatísticas do partido: 10 tiros a gol por 4 do Atlético e un 53% de posesión do balón contra o 47% dos colchoneiros.
Na segunda metade, o Deportivo botou un paso atrás e deixou máis espazo ao Atlético de Madrid. Ambos os equipos están en pretemporada e éso aínda se nota. Juan Rodríguez relevou a Verdú para dar máis consistencia no centro do campo. Lopo puido marcar no tramo inicial, pero o seu chute despois de varios rexeites foise lixeiramente alto.
O partido cambiou no minuto 66. Antonio Tomás, que antes recibira unha fea entrada de Sinama Pongolle, quen por certo non viu cartolina, entrou con dureza ao dianteiro branquivermello. No boureo que se forma entre ambos os equipos, Diego Costa propina un feo empuxón a Riki. Teixeira non o dubida e expulsa ao colchoneiro e mostra a amarela a Antonio Tomás. O Atlético pois encaraba a recta final da final cun home menos. Lotina, para evitar problemas maiores, senta ao mediocentro cántabro.
A partir de aquí arrefriouse o partido. O Deportivo moveu a pelota de lado a lado e apenas pasaron apuros os dous gardametas. Ao final, vitoria coruñesa con toda xustiza e un novo Teresa Herrera, o décimo sexto, que queda na Coruña.
Real Club Deportivo: Aranzubía; Laure, Lopo, Adrián López, Filipe; Sergio, Antonio Tomás; Verdú, Valerón, Pablo Álvarez e Mista. Banco de suplentes: Manu (porteiro suplente); Bodipo, Riki, Cristian, Juan Rodríguez, Rodri e Juanan. Tamén xogaron: Juan Rodríguez, Bodipo, Rodri e Riki.
Atlético de Madrid: Leo Franco; Antonio López, Diego Forlán, Luís García, Assunçao, Sinama, Maniche, Cedric, Abreu, Pablo e Valera. Banco de suplentes: Coupet (porteiro suplente); Pernía, Domínguez, C. Santana, D. Costa, Didi, Das Covas e Camacho. Tamén xogaron: Domínguez, C. Santana, Diego Costa, Didi e Das Covas.
Árbitro: J. A. Teixeira Vitienes, do Colexio Cántabro. Expulsou con vermella directa a Diego Costa do Atlético de Madrid por un empuxón a Riki co xogo parado.
Goles: 1-0, m. 8: Sergio, de penalti; 2-0, m. 37: Sergio, de forte chute desde fóra da área; 2-1, m. 45 (desconto da primeira metade): Abreu cabecea á rede unha falta.
