O Deportivo negocia co Manchester o posible traspaso de Naybet
O Presidente do Deportivo, Augusto César Lendoiro, mantén conversacións co máximo mandatario do Manchester United para o posible traspaso de Nourredine Naybet ao equipo británico.
Aínda que nestes momentos aínda existen diferenzas económicas entre os clubs, e dado que mañá finaliza o prazo de inscrición de xogadores para a liga de Campións, o Deportivo permitiu ao xogador marroquí viaxar hoxe mesmo ao Reino Unido.
Naybet desprazouse a Manchester nun voo privado que saíu de Lavacolla ás 20:30 horas acompañado polo seu representante, Lucidio Ribeiro.
Dado o inminente peche do prazo, as conversacións entre os presidentes de ambos os clubs, que se iniciaron na mañá de onte domingo, continuarán nas próximas horas.