O atacante fabrilista Óscar é a gran novidade na lista de 19 xogadores do Deportivo para afrontar mañá martes 3 de xaneiro en Riazor (21:15, Bein Sports) ante o Alavés a ida de oitavos de final da Copa do Rey.
Quedan fóra da convocatoria, ademais do meta Tyton e de Fayçal, este último concentrado con Marrocos, os lesionados Laure e Carles Gil.
Os convocados concéntranse mañá martes ás 13.30 no Hotel Meliá María Pita. Ao finalizar, todos eles regresarán ao hotel para cear, co obxectivo de coidar a alimentación ao máximo e facilitar así a recuperación física neste tramo da temporada con acumulación de partidos.
O adestramento desta mañá no campo 2 da cidade deportiva, cos fabrilistas Óscar, Monsalve e Alex Corredera, estivo orientado fundamentalmente á preparación de partido, con centros e remates, un partido once para once e ensaio de accións de estratexia.
Tras o partido copeiro, o equipo volve aos adestramentos o mércores 4 de xaneiro ás 11:30 en Abegondo.
