O RC Deportivo habilita a pre-reserva de entradas para o partido do domingo 2 de marzo ás 16:15h no Estadio Carlos Tartiere ante o Real Oviedo, correspondente á 29ª xornada de LaLiga Hypermotion.
O equipo ovetense puxo a disposición do RC Deportivo un total de 860 entradas, das cales o 40% serán xestionadas e vendidas pola Federación de Penas (344), e o resto a través do Club (516).
As localidades teñen un prezo de 20 euros e quedan limitadas a 2 por socio. Para realizar a xestión, o abonado deberá acceder á web despacho.rcdeportivo.es.
A pre-reserva poderase facer desde este martes 18 de febreiro ás 10:00 até o domingo 23 de febreiro ás 23:59 h. No caso de que houbese máis abonados en pre-reserva que entradas dispoñibles, realizarase un sorteo, cuxo resultado se comunicará aos abonados agraciados o luns 24 a partir das 9:00, os cales poderán acudir a recoller as entradas á OAD ese mesmo luns e o martes 25 de 10.00 a 13:30h e de 16.30 a 19.00h.
Se os gañadores non retiran todas as entradas, o mércores 26 no mesmo horario poranse á venda para aqueles que non lles tocou o sorteo; ou no caso de que non haxa sorteo, para o público en xeral.
Será obrigatorio presentar o abono e o DNI dos asistentes; e un deles debe ser o titular do abono.
