O RC Deportivo inaugura este sábado 26 de agosto, no primeiro partido de Liga en ABANCA-RIAZOR fronte ao CF Rayo Majadahonda (20:30 horas) a iniciativa "O Día Dé", coa que abre o Palco de Honra do Estadio á afección e á cidadanía. Este primeiro encontro será "O Día Dé os Socios de Ouro", os abonados cun mínimo de 50 anos ininterrompidos de antigüidade.
Deste xeito, 30 abonados de Ouro do Club por orde de antigüidade, con dereito a acompañante, ocuparán 60 prazas do palco principal do recinto, a localidade máis exclusiva e con mellor visibilidade de ABANCA-RIAZOR.
En cada partido en ABANCA-RIAZOR esta temporada, máis da metade das localidades do Palco de Honra estarán dedicadas a un colectivo da cidadanía ou a un sector da afección, para facer a entidade máis próxima e dar protagonismo á masa social deportivista e agradecer o seu excepcional apoio unha temporada máis.
