Víctor Fernández introduciu un só cambio respecto ao encontro do pasado domingo do Deportivo no Power8 Stadium de Cornellá ante o Espanyol. Lucas Pérez, que non superou a súa contusión no xeonllo esquerdo, deixou o seu posto no once a Juan Domínguez. No banco, o técnico deportivista si introduciu dúas novidades máis. Entraron Lopo e Canella entre os convocados en detrimento de Diakité e José Rodríguez. En fronte presentábase un Xetafe máis regular, aínda que coas baixas de Valera, lesionado; e Alexis, sancionado.
O partido arrincou no medio do diluvio e tal e como se esperaba. O Xetafe, moi agresivo en tarefas defensivas, agardaba replegado as acometidas do Dépor, para saír rápido á contra. A primeira oportunidade foi para Lafita, un do tres exdeportivistas enrolados nas filas getafenses. Pasado o cuarto de hora, marchouse en velocidade da defensa branquiazul pero o seu disparo cruzado fóiselle lixeiramente desviado.
Máis problemas tiña o Dépor para superar a tea de araña que Contra dispuxo diante da meta Guaita. O Xetafe adiantouse grazas a un gol de Yoda no minuto 35. O atacante do conxunto madrileño recibiu en banda dereita, encarou a Luisinho e o seu tiro raso pegou no poste esquerdo da meta de Fabricio, con tan mala sorte que rebotó nas costas do porteiro branquiazul para coarse na portaría.
Poucos minutos despois, Escudeiro, noutra veloz contra, estivo a piques de lograr o segundo gol, pero o seu disparo raso marchouse lixeiramente desviado do pau esquerdo. O Dépor pasaba os seus peores minutos cun Xetafe lanzado. Sarabia, cun disparo que se marchou tamén lixeiramente desviado, volveu pór en apertos a Fabricio.
Na área contraria, Medunjanin rematou alto un centro desde a banda esquerda. O internacional bosníaco estaba moi forzado. Cavaleiro tivo a ocasión máis clara ao bordo do descanso, pero o seu disparo, tras unha boa acción de Fariña, marchouse ao lateral da rede.
Con 0-1 e cun Xetafe quizais algo superior, chegouse ao descanso.
E peor non puido comezar a segunda parte, xa que na primeira xogada da continuación, unha rápida contra por banda esquerda dos visitantes acabou nun centro ao bordo da área pequena que Lafita, libre de marca, só tivo que empuxar.
O Dépor tratou de reaccionar, estivo máis metido que no primeiro acto e por iso a resposta non se fixo esperar. Conca tentou bater a Guaita pero o seu disparo foise desviado por pouco. O Xetafe deu un paso atrás ante o ímpeto deportivista e Víctor Fernández deu entrada a outro atacante: Toché relevou a Conca. Corría o minuto 58.
Pronto, o equipo de Contra ía aproveitar os espazos que loxicamente deixaba o Dépor atrás para crear máis perigo. Lafita puido lograr o terceiro en dúas oportunidades. Na primeira dribló a Insua e o seu disparo, raso, marchouse lixeiramente desviado ao pau dereito de Fabricio. Na segunda, tras unha mala cesión ao porteiro, recibiu de Sarabia, e disparou alto desde o bordo da área pequena.
Seguiu acumulando oportunidades o Xetafe mentres o Dépor apenas se achegaba aos dominios de Guaita.
A oportunidade máis clara foi para Postiga, que rematou na área pequena de cabeza pero sen precisión un bo centro desde a banda dereita. Pouco despois o portugués puxo o colofón a unha boa xogada individual de Cavaleiro por banda que combinou con Toché para que o murciano habilitase na frontal da área pequena a un Hélder que non perdoou no remate. O 1-2 fixo retornar a esperanza ao público de Riazor.
O Dépor seguiuno tentando ata o final do partido pero a pesar das chegadas á área de Guaita non dispuxo de ningunha outra ocasión clara para pór as táboas no marcador. Na última ata Fabricio incorporouse ao ataque para unha xogada que se estrelou contra a barreira e puxo o punto final a outro partido para esquecer.
R.C. Deportivo: Fabricio, Juanfran, Insua, Sidnei, Luisinho, Medunjanin, Juan Domínguez, Wilk (Canella, min. 46), Conca (Toché, min. 58), Fariña (Postiga, min. 46) e Cavaleiro.
Xetafe C.F.: Guaita, Velázquez, Naldo, Lafita (Míchel, min. 86), Lacen, Sarabia (Sammir, min. 78), Yoda, Arroio, Escudeiro, Juan Rodríguez e Freddy (Diego Castro, min. 69).
Árbitro: Hernández Hernández, do Colexio das Palmas. Amoestou a Wilk e Cavaleiro, por parte do Deportivo; e a Lafita por parte do Xetafe.
Goles: 0-1: Fabricio, en propia meta (min. 35); 0-2, Lafita (min. 46); 1-2 Postiga (min. 78)
Incidencias: partido da 10ª xornada da liga BBVA ante 20.150 espectadores en Riazor.
