Apenas 9 horas despois de chegar de Sabadell, na madrugada pasada, o Dépor xa estaba de novo no Dépor Training Center.
En rolda de prensa, Cristian Herrera apuntou que "o partido de onte (en Sabadell) xa foi, xa se gañou. Pasouse, gozouse na volta e xa estamos aquí outra vez tempraniño adestrando e xa preparando o partido ante o CD Castellón, que é o que temos que facer", en referencia ao encontro deste domingo 7 de decembro ás 18:30 (LaLiga TV Hypermotion e Fútbol 2, dispoñible en DIGI TV e outras plataformas) en ABANCA-RIAZOR.
O atacante deportivista insiste en que "o de onte (cuxos mellores momentos podes ver no vídeo ao pé destas liñas) e o de atrás está todo perfecto. Sérvenos como premio ao traballo que estamos a facer".
Os titulares na Nova Creu Alta fixeron a activación co grupo e pasaron a tarefas de recuperación no ximnasio e na sala de fisioterapia así como zona de auga.
Para o resto, o corpo técnico dispuxo ademais un exercicio táctico e unha tarefa de finalizacións.
Están con adestramento adaptado Escudero, Daniel Bachmann e Luismi Cruz. Ximo Navarro xa fixo a primeira parte co resto dos seus compañeiros antes de pasar a traballar co readaptador. O lateral encara a recta final da súa recuperación.
Pola súa banda, Brais Suárez, Samu, Damián Canedo, Íker Vidal, Fabi e Bil foron os representantes de #ANOSACANTEIRA.
Manuel Pablo, en rolda de prensa, mostrouse "contento" cos debuts onte de Samu e Damián Canedo. "Sei que están animados, alégranlles estas situacións. Despois saben que deben de ter a cabeza connosco e o rendemento que están a dar tanto a nivel individiual como colectivo dálle esas posibilidades", engadiu.
Este sábado 6 de decembro, Os Nosos adestraranse de novo no Dépor Training Center a partir das 10:30 horas.
