Porto-Dépor e Oviedo-Dépor, novas citas da pretemporada branquiazul
Tras a presentación onte do seu novo adestrador, Sérgio Conceição, hoxe se oficializa o partido de presentación do FC Porto 2017-2018 ante a súa afección, o que disputará ante o Dépor no Estádio do Dragão o 30 de xullo en horario por determinar. Será o encontro que peche un intenso mes de xullo para o equipo branquiazul.
O Dépor regresa deste xeito ás instalacións portistas 13 anos despois de xogar alí a ida das semifinais da Liga de Campións que acabaron gañando os portugueses en Gelsenkirchen o 26 de maio de 2004. Os Porto-Dépor e Dépor-Porto foron un encontro clásico de verán ao longo da centenaria historia de ambas as entidades, tras enfrontarse por primeira vez o 8 de febreiro de 1925.
Tamén se pechou nas últimas horas un novo amigable de preparación, o que enfrontará no Carlos Tartiere o 3 de agosto ao Real Oviedo e o Dépor. O conxunto carbayón aínda non pechou a temporada 2016-2017 e mantén opcións de entrar en fase de ascenso a LaLiga Santander.
Estes son os partidos confirmados ata o momento para a pretemporada do primeiro equipo deportivista:
13 de xullo: Racing Villalbés - Deportivo (A Magdalena, Vilalba) 14 de xullo: Arousa - Deportivo (A Lomba, Vilagarcía de Arousa) 15 de xullo: Silva - Deportivo (Campus Universitario de Elviña, A Coruña) 18 de xullo: Cerceda - Deportivo (O Roxo, Cerceda) 20 de xullo: Somozas - Deportivo (Manuel Candocia, Somozas) 22 de xullo: Bergantiños - Deportivo (As Eiroas, Carballo) 25 de xullo: Pontevedra - Deportivo (Pasarón, Pontevedra) 27 de xullo: Racing de Ferrol - Deportivo (A Malata, Ferrol) 30 de xullo: FC Porto - Deportivo (O Dragão, Porto) 3 de agosto: Real Oviedo - Deportivo (Carlos Tartiere, Oviedo) 5 de agosto: Deportivo - West Bromwich Albion (Riazor)