Os 60 nenos e nenas inscritos nas 5 quendas habilitads (luns ás 16:30, 17:30 e 18:30; e mércores ás 17:00 e ás 18:00 horas) da sede de Zas da Escola RC Deportivo recibiron o recoñecemento en forma de diploma.
Desta forma, púxose o punto e final a un emocionante ano con moito fútbol, cunha xornada de convivencia na Cidade Deportiva de Abegondo na que os alumnos compartiron vivenvias con Diego Gómez e Zakaria Eddahchouri; e unha visita ao Estadio ABANCA-RIAZOR con invitación incluída para o partido entre o Dépor e o CD Tenerife da Copa de Campións xuvenil.
O pasado mes de outubro arrincou un novo curso, o sétimo, da Escola RC Deportivo nestas sedes: Alvedro, Outes, Colexio Jesuitinas e Colexio Internacional Eirís; ás que houbo que engadir Sada e Zas.
Esta escola profesional de fútbol está destinada a todos os nenos e nenas entre 6 e 14 anos que desexen complementar a súa formación de maneira máis específica con adestradores da canteira do RC Deportivo, independentemente do seu nivel de práctica.
Ademais, na súa localización da Cidade Deportiva Arsenio Iglesias na Torre desenvolveu a súa actividade a Escola RC Deportivo Diversidade Funcional, destinada a todas as persoas con diversidade funcional entre 16 e 40 anos que desexen iniciarse no fútbol ou complementar os seus adestramentos de maneira máis específica con adestradores do equipo Genuine do RC Deportivo.
Este ano, a Escola RC Deportivo Diversidade Funcional puxo en marcha unha nova quenda os martes de 16:00 a 18:00 horas para alumnos e alumnas de 8 a 14 anos.
Toda a información acerca de tarifas, horarios, que inclúe a actividade, etc... pode consultarse en http://escola.rcdeportivo.es.
Para calquera dúbida ou consulta acerca da actividade así como calquera problema co proceso de inscrición poden contactar coa organización no correo electrónico escola@rcdeportivo.es.
