Primeiro día de Luis Ruiz no Dépor, nunha mañá que arrancou con charla arbitral ao cadro
Luis Ruiz Sayago (Huelva, 30 de xuño de 1992), a última incorporación deportivista, adestrouse por primeira vez na Cidade Deportiva ás ordes de Juan Antonio Anquela.
O adestramento arrancou con charla arbitral a cargo do colexiado galego Javier Iglesias Villanueva, co obxecto de explicar ao cadro as modificacións nas normas de xogo vixentes xa esta temporada.
Así pois, con case hora e media de atraso sobre o horario habitual deste verán, os futbolistas saltaron ao céspede na primeira sesión desta semana grande, última de pretemporada, que se pechará o sábado 10 co Trofeo Teresa Herrera en ABANCA-RIAZOR (21:00 horas) ante o Real Betis.
As tarefas foron fundamentalmente físicas, cun quecemento, rondos e un exercicio de carreira dirixido polo preparador físico Marcos Marcén.
Diego Rolan realizou xa unha parte co grupo e outra co readaptador, Fran Molano.
Mañá martes, o Dépor recupera a dobre quenda (10:00 e 18:30 horas) en Abegondo.