O Dépor ABANCA encara a recta final da competición en Primera Federación Iberdrola coa visita mañá sábado 13 de abril ás 18:45 ao Athletic Club B en Lezama.
O partido, como todos os da temporada en casa, poderase seguir en directo na canle de Youtube do RC Deportivo.
Con 9 puntos en xogo, As Nosas son segundas na táboa con 49 puntos, a 2 puntos do FC Barcelona B, líder con 51 pero que non pode ascender debido á súa condición de filial. Por detrás vén o RCD Espanyol, 3º con 45 puntos.
En rolda de prensa, Irene Ferreras asegurou que "temos que ir alí a gañar, a volver gañar porque é o que nos leva gustando toda a temporada, o equipo sabe facelo, temos argumentos, capacidade".
A adestradora branquiazul ten á súa disposición a todo o cadro salvo as lesionadas Ayaka e Cris Martínez, neste caso a consecuencia dunha escordadura de xeonllo.
A maiores, Elena Vázquez e Lucía Rivas son as dúas representantes de #ANOSACANTEIRA na lista de 18 convocadas.
No partido da primeira volta disputado en Abegondo o pasado 9 de decembro venceron As Nosas por 4-2, con goles de Ainhoa Marín, ADT -2- e unha futbolista rival en propia meta nun partido no que as vascas chegaron a ir con vantaxe no marcador por 0-2.
Precisamente o filial branquivermello, que na última xornada caeu (3-2) na súa visita ao Atlético de Madrid B, é 13º na táboa con 17 puntos.
En Lezama esta temporada o Athletic Club B non coñece a vitoria posto que empatou co CD Fundación Osasuna Femenino (2-2), Deportivo Alavés (0-0), Madrid CFF B (1-1), Atlético de Madrid B (1-1), CE Europa (1-1), CD Alba Fundación Femenino (0-0) e Alhama CF (0-0); e perdeu co DUX Logroño (0-2), SE AEM (0-1), RCD Espanyol (0-3) e Cacereño Femenino (0-1).
As Nosas realizaron esta mañá unha última sesión de traballo antes de viaxar por estrada ao País Vasco con esta folla de ruta:
Venres 12 de abril
10:30: Adestramento en Abegondo
12:10: Saída do autocar da Cidade Deportiva
19:05 (hora aproximada): Chegada ao hotel NH La Avanzada en Leioa (Biscaia)
Sábado 13 de abril
18:45: Athletic Club B - Deportivo ABANCA, en Lezama (campo 8)
Ao concluír, regreso en autocar á Coruña
As Nosas adestraranse de novo o luns 15 a partir das 9:15 no ximnasio de Abegondo antes de saltar ao campo ás 10:00.
