Hoxe domingo houbo tres interesantes citas en #ANOSACANTEIRA resoltas con vitoria do Alevín ante o Racing de Ferrol (4-0) correspondente á 2ª xornada do subgrupo norte do Trofeo Conservas Calvo; do Orzán SD Xuvenil Feminino sobre a SD Tordoia (3-0) na Primeira Autonómica Feminina; e do Orzán SD Cadete B Feminina fronte ao CCRD Perlío (4-0) na Segunda Autonómica Feminina, subgrupo 1º.
O groso da xornada en #ANOSACANTEIRA xogouse onte sábado.
En Abegondo, pola mañá, o Infantil superou ao CD Lugo (3-0) e o Xuvenil B ao Atlético Coruña Montañeros CF (2-0).
Para a tarde, o Fabril, líder da Terceira RFEF, gañou (2-1) ao Gran Peña FC con goles de Martín Ochoa e Iano Simao que chegaron xusto despois do tanto visitante ao comezo da segunda metade.
Este marcador deixa ao filial unha xornada máis á fronte da táboa.
Tamén no seu campo (Elviña Grande), o Orzán SD Cadete Feminino, xa campión do subgrupo A de a liga Galega, impúxose con claridade (8-1) ao Colexio Obradoiro, 2º clasificado.
Fóra de casa, concretamente en Avilés, o Dépor ABANCA B non puido (2-1) co terceiro clasificado na Primeira Nacional.
Pesaron no filial feminino as ausencias por lesión de Noela, Paula Novo, Andrea Ansede, Reigosa e Lucía Couto; e de Paula Monteagudo por estar en dinámica do primeiro equipo. A pesar desta derrota, o Deportivo ABANCA B mantén o liderado posto que o seu inmediato perseguidor na clasificación, o Sporting de Gijón, perdeu en Mareo co Lóstrego CF (0-1). O vestiario branquiazul celebra que Elena Vázquez foi convocada pola selección española sub-17 para disputar a Rolda 2, xa definitiva, de clasificación para o Campionato de Europa. Esta fase xogarase en Serbia do 12 ao 18 de marzo. Dinamarca, Serbia e Bielorrusia serán os rivais da selección española. O campión deste grupo accederá á Fase Final do Europeo, que se xogará en Estonia do 14 ao 26 de maio. Elena incorporarase á concentración do equipo nacional na Cidade do Fútbol de Las Rozas (Madrid) este luns 6 de marzo para, o venres 10, viaxar á localidade serbia de Stara Pazova.
En Cantabria, o Xuvenil A, que na semifinal de Copa do Rei medirase ao UD Almería no Estadio Reino de León o mércores 8 de marzo ás 20:00, tróuxose os 3 puntos (0-1) ante o Bansander grazas a un gol de Hugo Baldomar aos 2 minutos de xogo.
Precisamente do conxunto andaluz, Manuel Pablo, técnico deportivista, opina que "é un equipo competitivo, chegou até quí superando 3 roldas, é líder ou ía líder do seu grupo. Eliminou á UD Las Palmas no seu campo, onde gañara todos os seus partidos. É un rival complicado como todos nestas semifinais". Non ve favoritos en semifinais porque "está todo moi igualado. O Madrid pode ter unha pequena vantaxe pero moi pequena. Todos teñen o obxectivo tan próximo que as forzas se igualan. Son partidos de moito nivel, de equipos moi competitivos que están a un paso de poder chegar a unha final e ninguén vai regalar nada".
Ademais houbo representación de #ANOSACANTEIRA na Coruña (0-5 o Cadete ante o Ural Español CF); en Vigo (2-1 o San Tirso SD Cadete ante o RC Celta); en Santiago (2-1 o San Tirso SD Infantil fronte ao Victoria FC); e en Ourense (1-2 o Orzán SD Infantil Feminino ante o EFF Rosalía) neste caso no inicio da carreira polo título da liga Galega.
A esta fase final accederon da Primeira Fase os dous primeiros clasificados do subgrupo A (Orzán SD Infantil Feminino e o SCD Pastoriza), os dous primeiros do subgrupo B (Victoria FC e Atlético Arousana) e os dous primeiros do subgrupo C (UD Mos e EFF Rosalía). O formato de competición é de liga a dobre volta todos contra todos. O primeiro clasificado será o campión galego
Finalmente, xogaron na Torre o Alevín e os dous equipos benxamíns. No equipo de Alberto Suárez, varios futbolistas branquiazuis disputaron esta semana coa selección galega sub-12 un amigable de preparación ante o Escola Estrada FB: Iker Obeso, Brais Taín, Antón Vilariño e Thiago Montes.
O Fabril FC Alevín adiantou ao pasado mércores en Abegondo o seu partido ante o Sada CF A correspondente á 15ª xornada no subgrupo 2º de Primeira A Coruña - As Mariñas.
O equipo de Jorge Queijeiro, que gañou (5-1) ao cadro sadense, é líder destacado do subgrupo con 40 puntos.
O motivo de que se adiantou este choque débese a que o cadro fabrilista participou hoxe sábado 4 nunha acción impulsada pola Fundación RC Deportivo de reforestación e ao mesmo tempo gozar dunha gran xornada familiar, festiva, Deportivista e co obxectivo de impulsar o valor da conservación ambiental. Grazas á colaboración do Grupo Naturalista Hábitat na zona de Laza (Ourense), todas as persoas que participaron, ademais do Fabril FC Alevín, axudaron a reforestar a nosa contorna natural con case 900 árbores de especies autóctonas cun obxectivo tan fundamental como o de producir o osíxeno necesario para os seres vivos que habitamos o Planeta.
Como se anunciou no momento de lanzamento de cada unha dos equipamentos desta temporada, Galicia Azul, Galicia Atlántica e Galicia Verde, as camisetas do Dépor 2022-2023 servirán para pór a disposición da sociedade o potente altofalante social do Club e organizar ou colaborar na difusión de campañas de concienciación de coidado e limpeza dos mares, costas e bosques, proxectos cos que o Club colabora a través da súa Fundación para contribuír aos Obxectivos de Desenvolvemento Sustentable de Nacións Unidas. Neste caso, concretamente ao 15: Vida de ecosistemas terrestres.
Kappa e o RC Deportivo puxeron en marcha a campaña: "Unha camiseta, unha árbore". Con ela adquírese o compromiso de plantar unha árbore por cada camiseta do modelo Galicia Verde que se vendese a través das DéporTiendas ao longo da temporada. Cada camiseta vendida de Galicia Verde significa unha árbore plantada nas provincias de Galicia máis afectadas os incendios de verán. A esta acción sumouse Hijos de Rivera coa súa marca Cabreiroá para facer posible unha gran actividade de repoboación de árbores nunha das zonas do noso territorio máis afectada polos incendios.
Os resultados da fin de semana foron os seguintes:
Terceira RFEF
23ª xornada: FABRIL 2 (Martín Ochoa e Iano Simao) - GRAN PEÑA FC 1
Categoría feminina
Primeira Nacional, 21ª xornada: REAL AVILÉS CF 2 - DEPORTIVO ABANCA B 1 (Laura Otero)
Primeira Autonómica, 21ª xornada: ORZÁN SD XUVENIL FEMININO 3 (Iria Otero, Laura Santos e Sara Cercido) - SD TORDOIA 0
Segunda Autonómica, subgrupo 1º, 17ª xornada: ORZÁN SD CADETE B FEMININO 4 (Lucía González -2-, Dunia Dahmouni e Yanis Citoula) - CCRD PERLÍO 0
Liga Galega cadete, subgrupo A, 17ª xornada: ORZÁN SD CADETE FEMININO 8 (Valeria Montero -2-, Macarena González, Candela Fernández -2-, Ánxela Prado, Emma Gandoy e Daniela Basalo) - COLEXIO OBRADOIRO 1
Fase polo Título da liga Galega, 1ª xornada: EFF ROSALÍA 1 - ORZÁN SD INFANTIL FEMININO 2 (Marta Moreno -2-)
Categoría xuvenil
División de Honra, 23ª xornada: BANSANDER 0 - XUVENIL A 1 (Hugo Baldomar)
Liga Nacional, 23ª xornada: XUVENIL B 2 (Domínguez e Juan Barros) - ATLÉTICO CORUÑA MONTAÑEROS CF 0
Categoría cadete
División de Honra, 24ª xornada: URAL ESPAÑOL CF 0 - CADETE 5 (Rubén -2-, Brian -2 e Iván Barreiro)
División de Honra, 24ª xornada: RC CELTA 2 - SAN TIRSO SD CADETE 1 (Leandro)
Categoría infantil
División de Honra, 21ª xornada: INFANTIL 3 (Casuso, Mauro e Gael) - CD LUGO 0
División de Honra, 21ª xornada: VICTORIA FC 2 - SAN TIRSO SD INFANTIL 1 (Sergio Cortizo)
Categoría alevín
Trofeo Conservas Calvo de fútbol 11, 2ª xornada: ALEVÍN 4 (Íker Obeso -2-, Mario González e Thiago Montes) - RACING DE FERROL 0
Primeira A Coruña - As Mariñas, subgrupo 1º, 14ª xornada: CD CALASANZ 3 - ALEVÍN 5 (Íker Obeso -2-, Javi Barral, Leo Sánchez e Thiago Montes)
Primeira A Coruña - As Mariñas, subgrupo 2º, 15ª xornada (xogado o mércores): FABRIL FC ALEVÍN 5 (Álvaro Gómez -3- e Hugo Macedo -2-) - SADA CF A 1
Categoría benxamín
Primeira A Coruña - As Mariñas, subgrupo 1º, 14ª xornada: BENXAMÍN A 11 (Hugo Quintela -4-, Miguel Candal -2-, Hugo Bujía -2-, Alejandro Astray, Xiao Fontao e Pablo Sánchez) - ORILLAMAR SD A 0
Primeira A Coruña - As Mariñas, subgrupo 1º, 14ª xornada: FABRIL FC BENXAMÍN 0 - URAL ESPAÑOL CF 5
