Admitindo, por suposto, que os adestradores tamén se equivocan, aínda que algúns se neguen a recoñecelo.
Vén todo isto a conto polo que está a ocorrer cos xogadores do Fabril, enrolados ultimamente no Deportivo por decisión do novo técnico, Luís Rodríguez Vaz. Xa dixemos no seu momento que se corría moito risco aliñando a catro fabrilistas de golpe no primeiro equipo branquiazul.
Aínda aceptando as facultades que posúen estes mozos, están faltos da experiencia que se require na Segunda División.
Máxime se se dan as circunstancias, como así ocorre, de nerviosismo e de falta de confianza no conxunto, por mor da súa comprometida situación na táboa clasificatoria.
Cando se quere incrustar savia nova nun equipo, adoita facerse dosificadamente, é dicir, incluíndo un xogador ou todo o máis dúas considerados promesas entre os veteranos do persoal.
Pero catro á vez resulta unha cota excesiva segundo vén comprobando nos recentes partidos do Deportivo...
Un experimento este que non debe facerse máis que en momentos de bonanza, porque en caso contrario prexudícase aos novos valores, os cales ven coaccionados pola tensión ambiental e así pouco poden contribuír a mellorar o comportamento do equipo, utilizándoos como teóricos reforzos.
