Neste man a man entre o Dépor ABANCA e o RCD Espanyol no que parece converterse a Primera Federación Iberdrola, as branquiazuis renden visita mañá sábado 13 de xaneiro ás 16:00 ao Madrid CFF B. O encontro, correspondente á 14ª xornada, xogarase no madrileño Estadio Antigo Canódromo.
As Nosas mandan na táboa con 30 puntos, con 2 puntos de renda sobre o RCD Espanyol, 2º con 28 puntos. A pasada fin de semana, ambos os equipos resolveron con empate os seus respectivos compromisos.
Irene Ferreras adestrouse boa parte desta semana no Monte, un campo de herba sintética como a superficie na que se xogará o partido.
En rolda de prensa, a adestradora branquiazul subliñou que a semana de traballo foi "cortita, que se agradece. Tivemos máis nada que 3 sesións para preparar o partido, pero suficientes".
Lembra que "cando te quedas coa sensación un pouco agridoce de non poder gañar o último partido apetéceche xogar canto antes. Nese sentido estamos contentos, con ganas de volver competir".
Ve ao seu equipo "moi mentalizado, moi preparado e a por os 3 puntos, que é o que imos tentar".
Irene Ferreras ten a todo o seu cadro á súa disposición fóra de Laurina, polo que "tocará decidir", apostila. Iso si, Henar, castigada cun partido por acumulación de amoestacións, queda na Coruña.
Lucía Rivas, na foto principal da noticia, repite como representante de #ANOSACANTEIRA. A canteirá debutou a pasada fin de semana ante o CD Alba Fundación sendo ademais titular. A ela únense Elena Vázquez e Carmen Carballada.
Pola súa banda, o Madrid CFF B, que caeu a pasada fin de semana (1-0) na súa visita ao DUX Logroño, é 13º na táboa con 8 puntos, só por diante do Athletic Club B.
No seu campo do Antiguo Canódromo esta temporada o filial do conxunto madrileño perdeu co SE AEM (0-3), Alhama CF (0-3) e CE Europa (0-2); gañou ao Cacereño Femenino (3-1) e CD Fundación Osasuna Femenino (2-1); e empatou co RCD Espanyol (1-1), o rival directo do Dépor ABANCA polo título e o ascenso á Liga F.
Antes de partir de viaxe, As Nosas completaron esta mañá unha última sesión de traballo en Abegondo.
O plan de viaxe do Dépor ABANCA é o seguinte:
Venres 12 de xaneiro
9:30: Adestramento en Abegondo
11:30: Saída en autocar a Madrid
19:00 (hora aproximada): Chegada ao Hotel AC by Marriot San Sebastián de los Reyes
Sábado 13 de xaneiro
16:00: Madrid CFF B - Deportivo ABANCA, no Estadio Antiguo Canódromo
Ao concluír, regreso en autocar á Coruña
As Nosas adestraranse de novo en Abegondo o domingo 14 de xaneiro ás 13:00 horas.
