Un total de 145 nenos e nenas que participaron na primeira quenda do Dépor Campus Cabreiroá Nadal 2025 desde o pasado luns 22 de decembro nas sedes do Dépor Training Center (foto principal da noticia), Alvedro (foto entre o texto) e Sada (foto inferior) recibiron este mércores 24 de decembro o seu diploma acreditativo.
Cunha foto de grupo para o recordo concluíu esta primeira parte dunha actividade que chega da man da RC Deportivo Fundación, unha das máis esperadas das datas do Nadal.
Dirixido a nenos e nenas entre 6 e 14 anos, fomenta valores como o xogo limpo, o respecto polo rival, o esforzo, a solidariedade e a amizade a través do deporte.
Estes primeiros 145 alumnos e alumnas gozaron de sesións de adestramento adaptadas á súa idade e nivel, dirixidas por técnicos de #ANOSACANTEIRA, nunha contorna formativa que combina deporte, diversión e convivencia.
A segunda quenda, con 200 inscritos, desenvolverase o luns 29, martes 30 e mércores 31 de decembro co mesmo horario, de 10:00 a 14:00 horas, nestas sedes: Alvedro (15), Pontedeume (65), Club do Mar de San Amaro (19) e Colexio Santa María del Mar (109).
Do mesmo xeito que nesta semana, haberá sorpresas, sorteo de agasallos e diplomas a todos os nenos e nenas, ademais de snaks saudables durante a actividade en colaboración con FEIRACO e GADIS.
O Dépor Campus Nadal Cabreiroá consolídase así como unha experiencia única para vivir o deporte durante as vacacións de Nadal, fomentando hábitos saudables e o sentimento de pertenza desde idades temperás.
O RC Deportivo reforza o seu compromiso co deporte base e con iniciativas que promoven a formación integral dos máis novos.