Un último adestramento esta mañá en Abegondo puxo o punto e final á semana sen fútbol ligueiro para o Deportivo ABANCA, debido ao parón da competición no grupo norte de Reto Iberdrola.
A gardameta Ana Valles comentaba en rolda de prensa antes de saltar ao céspede que esta semana foi "máis intensa do normal porque non competimos a fin de semana. Seguimos un pouco a dinámica das mesmas semanas que vimos traballando, pero con ese plus de carga, porque ao non ter competición a fin de semana o adestramento é o vital".
De feito explica que as sesións destes días estiveron orientadas a "un pouco de mellora cara o noso xogo: ter máis velocidade, maior posesión..."
O cadro branquiazul descansa mañá sábado e o domingo; e regresará aos adestramentos o luns ás 17:00 na Cidade Deportiva.
A próxima cita ligueira será ante o DUX Logroño no Estadio de Las Gaunas, en partido correspondente á 7ª xornada. O encontro xogarase a fin de semana do 30 e 31 de outubro (pendente de confirmación).
