O canteirán agradécelle a Víctor Fernández "a confianza de darme a oportunidade onte nun partido difícil, con 2-0. Quizais o máis lóxico fose facer un cambio defensivo, aguantar o partido. Meteume a min pronto, que son máis de corte ofensivo. Foi un cambio valente".

Rememorou o momento no que o técnico se dirixiu a el para ordenarlle quentar, xa iniciada a segunda metade: "Practicamente nin quentei. Díxome que quentase rápido e ao tres minutos xa entrei. Xa case non me deu tempo a pensar. Daquela unha vez entras ao campo xa máis tranquilo e por sorte gañouse e foi un debut soñado".

Advirte que "é unha alegría poder participar. Non deixei de traballar, tentei ser o mesmo, aprender cada día, mellorar, non caer na desesperación e déronme esta oportunidade pero non cambiou nada. Eu teño que seguir traballando igual e tentar demostrar ao míster que podo estar aí. Logo xa se verá".