- De esquerda a dereita, Botanita, Lechuga, Otero e Zubieta, antes de empezar o partido en Buenos Aires ante San Lorenzo de Almagro o 22 de xullo de 1954 (foto cedida pola Familia Otero Cerveró) -
Manuel Lechuga Boado, xogador do primeiro cadro deportivista durante gran parte dos anos 50 do pasado século, faleceu aos 90 anos de idade.
Lechuga, nacido na Coruña o 6 de outubro de 1929, comezou a xogar ao fútbol en varios equipos modestos da cidade, como o Atlético Olmos, a María Pita e o Español de Santa Lucía. Após sobresaír neste último chamou a atención de Don Rodrigo García Vizoso, que o fichou para o CD Juvenil, entón filial deportivista.
Durante a Temporada 1950-1951 deu o salto ao primeiro equipo, debutando no partido de Copa ante o Racing de Santander (1-0, gol de Rafael Franco) en Riazor, o 29 de abril de 1951.
Leituga, fino centrocampista ou interior, disputou 97 encontros oficiais coa elástica branquiazul, 81 deles en Primeira División, nos que anotou 14 tantos, todos na máxima categoría do fútbol nacional.
O xogador coruñés foi un dos artífices da primeira vitoria branquiazul nun Trofeo Teresa Herrera, na súa primeira participación. Foi na X edición do torneo, en 1955, na que o Deportivo vencía ao Athletic por 2-1, mercé a un 'gol de ouro' de Pahíño no minuto 130. Os branquiazuis, dirixidos por Rodrigo García Vizoso, formaron con: Otero; Rodolfo, Manín, Irusquieta; Botana, Juananco (Cuenca); Arsenio, Pahíño, Juan, Lechuga (Bazán) e Polo.
Despois de xogar cedido no Oviedo a primeira metade do curso 1956-1957, Lechuga regresou para despedirse do seu periplo deportivista. Tamén foi nun encontro de Copa, aínda que esta vez en Atocha fronte á Real Sociedad (7-1), o 19 de maio de 1957. A campaña seguinte fichou polo Xerez para acabar retirándose da práctica profesional do fútbol no San Fernando.
O RC Deportivo desexa mostrar o seu máis sentido e sincero pésame a familiares, amigos, excompañeros e a todo o deportivismo. DEP.
