- Foto: Suso Ribadeo @RibadeoFC -
O Fabril, actual líder da Tercera RFEF, caeu (0-1) co CD Lugo B Polvorín FC, campión a pasada campaña da citada categoría e agora no grupo 1º de Segunda Federación, na LXXI edición do Trofeo Emma Cuervo, un dos decanos do fútbol internacional xunto co Teresa Herrera.
O partido xogouse esta tarde no campo Pepe Barrera de Ribadeo.
Óscar Gilsanz tivo a baixa obrigada de Brais Val, en dinámica do primeiro equipo ao longo de toda esta semana.
O técnico fabrilista levou a este último compromiso de 2022 a varios xuvenís: Quique Teijo, Carlos, Martiño, Hugo, Manu Berrocal, Vilela, Rubén, Garaboa e Álex Delgado.
A presente edición do Trofeo Emma Cuervo íana a disputar o RC Deportivo e o Unionistas de Salamanca CF o pasado 20 de agosto pero foi finalmente suspendido debido ao compromiso oficial do conxunto salmantino na Copa Federación.
Si se celebrou o pasado mes de agosto a II edición do Trofeo Emma Cuervo feminino, que levou o Dépor ABANCA ao derrotar ao Real Oviedo na quenda de penaltis (4-2), despois de que o encontro acabase con igualada (1-1).
No duelo de filiais desta tarde decidiu un tanto lucense na primeira metade.
Fabril: Brais Suárez, Currás, Fito, Barcia, Iano Simão, Barba, Jairo, Iñaki, Jesús Ares, Diego Gómez e Davo. Tamén xogaron: Hugo Ríos, Ruben, Manu Berrocal, Hugo, Carlos, Quique Teijo, Álex Delgado, Martiño, Vilela e Garaboa.
O filial deportivista retoma a liga o 7 ou 8 de xaneiro de 2023 en Abegondo ante o CD Barco.
