Insiste en que "é un partido importante para todos nós, para os que van ir convocados, para os que non van convocados, para os que están lesionados... É un partido que marca a carreira de todos. Se te mantés todo o mundo sae beneficiado e se non, non".

Subliña o dianteiro branquiazul que "para nós é o partido da nosa vida neste momento. Teñen que sentir que nós nos estamos xogando moitísimas cousas, e eles non se están xogando nada. Teñen que notar ese sufrimento que nós temos e tentar xogar con iso".

Apunta Oriol que o Deportivo debe facer no Camp Nou "un partido intelixente. Quitarlle o balón ao Barça é practicamente imposible. Hai que tentar meter moita intensidade, ser moi solidarios, tentar tapar ocos a través do esforzo e a solidariedade".

Desvela o ariete branquiazul que o vestiario ten a sensación de que "se puntuamos, temos opcións moi altas de permanecer en Primeira División. Hai ilusión de xogar este partido, de competilo e de ver que é o que pasa. Foi unha tempada longa, con moitas cousas deportivas e extradeportivas".