RCDeportivo RCDeportivo RCDeportivo
Skip to main content
GL
PORTADA

Sangue, suor e Lucas para gañar ao Rayo (1-0)

A segunda volta do Dépor arrincaba en ABANCA-RIAZOR ante un rival que, após a chegada de Alfredo Santaelena ao banco, cambiou as súas prestacións para converterse nun equipo tremendamente competitivo. Para buscar a vitoria Óscar Cano tivo que facer modificacións por sancións e lesións en case todas as liñas do equipo.

O partido empezou co Dépor metendo atrás ao Rayo e sumando ocasións. A primeira, após un centro demasiado pasado de Antoñito que non atopou rematador, tívoa Lucas a pase de Quiles, que xa dentro de área pequena, atopouse ao cruzamento a Ofoli Quaye para bloquear o seu disparo e enviar a córner. Á saída do mesmo, Pablo Martínez rematou de cabeza ás mans de Lucho.

As tornas investíronse na seguinte clara para o Dépor nun pase en profundidade para o de Monelos que case desde a liña de fondo serviu atrás para a chegada de Quiles que rematou duro pero desviado sobre a portería do Rayo. A seguinte foi de novo para Lucas após un roubo de Olabe que deixou en curto na frontal para que disparase por encima. Tampouco atopou portería Villares en xogada persoal dentro da área.

Clara tamén foi a de Soriano que, a pase de Narro, tentouna coar baixo as pernas a Lucho García que estivo atento para evitar o gol. E case seguido, despois de que Pablo rematase alto un córner, de novo Mario fixo lucirse a Lucho cunha gran estirada abaixo.

Na primeira parte o Rayo só dispuxo dunha oportunidade á media hora nun centro colgado que Ofoli Quaye rematou lixeiramente desviado.

A segunda parte empezou con senllos disparos con rosca de Quiles e Lucas que se marcharon desviados, aínda que a máis clara tívoa Yeremay recentemente entrado ao campo nun man a man que acabou estrelando no peito de Lucho. Unha xogada similar, pero na frontal da área pequena, en lugar da grande, si a puido aproveitar Lucas para anotar o único gol do partido que acabou celebrando primeiro ante o porteiro visitante co que se desafiou durante todo o partido e despois coa bancada de Marathón e todo o estadio.

Soriano raso desde a frontal tentárao antes, aínda que a máis clara para o segundo foi un zapatazo de Pablo Martínez desde a frontal que obrigou a lucirse a Lucho.

O Rayo só inquietou cunha falta perigosa que se estrelou na barreira camiño do 90, que abriu un período de case 12 minutos de desconto polas interrupcións do segundo tempo, especialmente pola atención que recibiu Isi Gómez xusto mentres o Estadio celebraba o gol pola fractura sufrida no seu brazo dereito.

Coa tensión de que o Rayo puidese empatar nunha xornada na que o resto dos resultados favorecían ao Dépor, acabou o partido en ABANCA-RIAZOR, un encontro para volver apertar as posicións de cabeza e para pasar á Nosa Historia ao ser o que mete a Álex Bergantiños no top-10 de Deportivistas con máis choques defendendo As Nosas Cores.

RC Deportivo: Edu Sousa, Antoñito, Lapeña, Jaime, Pablo Martínez, Diego Villares, Olabe (Isi Gómez, min. 71; Álex Bergantiños, min. 81), Mario Soriano (Svensson, min. 90+2), Quiles (Kuki Zalazar, min. 90+2), Víctor Narro (Yeremay, min. 71) e Lucas.

CF Rayo Majadahonda: Lucho García, Aldalur, Ofoli Quaye, David Rodríguez (Zozulia, min. 69), Mario (Sergio Llamas, min. 46), Néstor Albiach, Javi Ros (De Iriondo, min. 80), Dani Pinillos, Josu Ozkoidi (Alayeto, min. 69), Rahim e Nando (Jeisson, min. 80).

Goles: 1-0 Lucas (min. 77)

Árbitro: Román Román (c. castelán-leonés). Amoestou aa Mario (min. 42), Olabe (min. 45), Villares (min. 50), Lucho García (min. 56), Lapeña (min. 57), Rahim (min. 75), Lucas (min. 79), Aldalur (min. 90), De Iriondo (min. 90), Kuki Zalazar (min. 90+4) e Svensson (min. 90+8)

Incidencias: partido da 20ª xornada de Primeira Federación disputado no Estadio ABANCA-RIAZOR ante 18.837 espectadores.