Insiste Toché que "en todo momento fomos superiores. Non se se eles tiveron un mal día, pero nós en todo momento tivemos o partido controlado. Tivemos ocasións para gañar. Creo que o Deportivo foi superior pero ao final na liga hai que ser regular. Temos que obrigarnos a nós mesmos e seguir nesa dinámica positiva".

Advirte o dianteiro deportivista que "o equipo está a gañar en confianza, está a gañar en cousas que ao principio as tiñamos bastante verdes. Tiñamos unha base boa e eu creo que agora estamos a mellorar. Se seguimos así imos dar moitas alegrías. Espero que ao final de ano non suframos".

Sobre os bos números en defensa, Toché opina que "agora estamos mellor defensivamente. O equipo está mellor armado e cóbrese moi ben as costas. O outro día en ataque puidemos facer máis. Faltounos esa definición, esa tranquilidade no último pase. Creo neste sentido que os atacantes estivemos peor que os defensas".

Ante a visita do Barcelona, Toché lembra que no primeiro partido de Guardiola no Barcelona "fomos capaces de gañarlle co Numancia". Iso si, recoñece que "hai moitísima diferenza, analizando orzamento e xogadores".

Por esta circunstancia, pide "saír con humildade, a traballar e a tentar sacar algo, tentar facelo ben. Polo menos deixarnos a pel e dar o noso cento por cento. Que se cadra non é suficiente, pero tentalo polo menos".