Os xogadores do Fútbol Formativo do RC Deportivo sometéronse nas últimas semanas a un screening podolóxico e análise da pisada levado a cabo polos podólogos da Clínica del Pie Factor Biomecánico (https://factorbiomecanico.com/).
O motivo principal do estudo é a prevención e poder recomendar medidas individualizadas a cada deportista, dado que os estudos científicos poñen de manifesto o elevado risco de lesións durante o adestramento e a competición en idades de formación. Neste estudo avalíanse parámetros do pé relacionados coa predición do risco de lesións, identificando posibles factores de risco, en base á súa idade, maduración, características antropométricas e biomecánicas, así como carga de adestramento.
Con iso, desde a Clínica del Pie Factor Biomecánico e o RC Deportivo preténdese elaborar e propor un protocolo individualizado de intervención podolóxica naqueles xogadores onde os seus resultados se identifiquen como potencialmente lesivos e/ou que poidan afectar o rendemento.
Desde a dirección do proxecto apuntan que "o obxectivo principal é reducir o risco de lesións en idades de formación no Dépor e aumentar a dispoñibilidade dos xogadores en idades de formación".
