Preto de 250 participantes das sedes da Escola RC Deportivo en Alvedro, Outes, Carballo, Arteixo, Colegio Internacional Eirís e Colexio Xesuitinas puideron gozar dunha xornada de convivencia na Cidade Deportiva de Abegondo, o pasado domingo 21 de abril.
A xornada comezou ás 16:30h. onde os participantes recibiron a visita sorpresa de Jose Ángel, que se fotografou cos diferentes grupos como recordo deste día.
A actividade desenvolveuse nos campos 5 e 6, así como nos campos de fútbol 8, con múltiples xogos, todos eles relacionados co fútbol, para que os adestradores do RC Deportivo puidesen observar de primeira man aos alumnos e alumnas de todas as sedes.
Desde as 17:00 até as 19:00h. disputáronse partidos de maneira simultánea. Os participantes xogaron diferentes competicións, cambiando de campo a campo con distintos rivais durante o transcurso da tarde.
Trala competición, no propio campo realizáronse sorteos de agasallos entre os grupos para posteriormente despedirse das familias que acudiron ao evento.
A Escola RC Deportivo continuará os seus adestramentos en todas as súas sedes até o próximo 31 de maio. Unha vez finalizadas as clases, abrirase primeiro a preinscrición e reserva de praza aos participantes desta temporada e posteriormente abrirase a inscrición para o novo curso ao público en xeral.
Este ano bateuse a marca de participación entre as diferentes sedes da Escola, superando os 350 participantes.
O novo curso da Escola RC Deportivo comezará en outubro. Calquera club ou centro educativo que desexe sumarse ao proxecto pode solicitar información da actividade a través do correo electrónico escola@rcdeportivo.es.
Toda a información tamén pode consultarse na páxina web escola.rcdeportivo.es/gl.
