Álvarez: "debémonos á entidade"
O adestrador do Sevilla dixo, ante a posibilidade de que os futbolistas se neguen a xogar o domingo, que "por respecto ao club e á afección o equipo debe seguir. Non nos poden sinalar co dedo por non cumprir coa nosa obrigación".
O persoal falará o mércores
Os xogadores sevillistas, tras o seu adestramento, mantiveron unha reunión tras a que non quixeron facer declaracións sobre a posibilidade do plante e remitíronse a un comunicado que lerán na tarde do próximo mércores.
A RFEF, polo "sentido común"
O presidente da Federación Española de Fútbol, Angel María Villar, mostrou a súa preocupación polos incidentes e expresou a súa confianza en que os xogadores do conxunto sevillano rexeiten a idea de non xogar.
"Os sucesos de Sevilla non desexamos que ocorran, pero están aí. Estou preocupado, pero creo que virá o sentido común".
O presidente da RFEF volveu facer unha defensa dos árbitros españois, aínda que recoñeceu que poden cometer erros porque "son homes".
"Estou satisfeito da actitude dos árbitros. Temos árbitros tan bos como os nosos xogadores e eu defendo a honestidade dos árbitros ao cento por cento".
Opinan Guardiola, Figo e Schurrer
O capitán do Barcelona reprobou as críticas dos dirixentes dos clubs contra os árbitros. "Aqueles directivos que lanzaron con bala a semana pasada, hoxe xa se lles esgotaron da recámara", en clara alusión a Lendoiro e a Lorenzo Sanz.
"Sempre é mellor manter a boca pechada", engadiu Guardiola, mentres que Figo entende que, despois das supostas xogadas que beneficiaron ao Depor aqueles directivos críticos deberían sentirse confundidos. "Non sei con que cara poden facer agora declaracións!".
O deportivista Schurrer limitouse a dicir que os árbitros "pitan o que ven. Eu non vin a xogada no campo, pero na televisión a liña fai ben levantando a bandeira. O que non sei é se acerta o árbitro".
Só un detido
A Policía de Sevilla puxo a disposición xudicial a Cristian G.A., de 23 anos, como autor de delitos de desordes públicas e atentado, por mor dos incidentes que se produciron tras o partido.
Este mozo foi a única persoa detida por estes incidentes, onde tres policías resultaron con lesións leves, cinco vehículos policiais sufriron graves danos e unha unidade móbil da Cadea Cope foi incendiada.
