A Xunta de Accionistas aproba un orzamento de 12.475 millóns
Esta tarde noite tivo lugar a Xunta de Accionistas ordinaria e extraordinaria do Real Club Deportivo da Coruña. O acto, celebrado no Polideportivo da Sardiñeira, non estivo moi concorrido xa que os accionistas preferiron delegar o seu voto. A Xunta aprobo
En segunda convocatoria só estivo representado o 5'57% do accionariado do Club, representado por 64 accionistas na Xunta Xeral Ordinaria e 63 na Xunta Xeral Extraordinaria. Os puntos da orde do día da Xunta Xeral Ordinaria, que correspondían á aprobación das contas anuais e a da xestión do Consello de Administración saldáronse con unanimidade nas súas respectivas votacións.
Na Xunta Xeral Extraordinaria tratouse a aprobación do orzamento para a presente campaña, que tamén foi aprobado por unanimidade. O punto no que se ratifica a Manuel Montiel Duque como membro do Consello de Administración en substitución de José Luís Guillín tamén foi aprobado pola totalidade dos presentes. O único punto da orde do día que tivo 6 abstencións, pero que se aprobou igualmente, foi o que corresponde á aprobación da remuneración dos membros do Consello de Administración polas súas tarefas con 150.000 pesetas mensuais.
Así se explicou a división máis concreta das tarefas entre os membros do Consello: Luís Sánchez Doporto ocupándose da Cidade Deportiva; Francisco Dopico das categorías inferiores e as penas; Manuel Montiel das relacións con UEFA, FIFA E RFEF; Roberto Veira ocupándose das relacións externas e con outros clubs; Felipe Marcos da secretaría do consello e do merchandising; Javier Chaver das Deportiendas e da Deporclínica e Jesús Rebollo da publicidade estática e dinámica do estadio e a relación coas empresas que teñen os Palcos VIP. O punto informativo no que se explicaron os avances no Plan Quinquenal 2000-2005 pechou unha Xunta de Accionistas marcada pola normalidade.