Como cada verán regresa a principal actividade social do RC Deportivo a través da súa Fundación, os DéporCampus Cabreiroá, nos que participan miles de nenas e nenos de boa parte de Galicia e para os que hoxe venres 2 de maio abriuse o prazo de inscrición nas 17 sedes nas 4 provincias galegas. Este ano desenvolveranse, para participantes desde os 6 aos 14 anos (é dicir os nados de 2011 a 2019 incluídos), entre finais do mes de xuño e principios de agosto, independentemente do nivel de práctica ou experiencia futbolística.
Abegondo, Bertamiráns, Boiro, Caranza, Cee, Cuntis, Monforte, Ourense, Santa Comba, Sarria, Silleda, Terras de Maside, Vila de Marín e Zas; ás que este ano 2025 súmanse Lugo, Cedeira e Vilalba son agora mesmo as localizacións nas que se desenvolverá a actividade en diferentes semanas do tres meses de verán.
Como cada ano, a instalación con máis semanas de actividade será a Cidade Deportiva de Abegondo, que acollerá o DéporCampus Cabreiroá 2025 en seis quendas, un por semana, entre o 23 de xuño e o 1 de agosto.
Para esta sede central ademais, debido ás obras na instalación, haberá prazas limitadas. Por conseguinte, os participantes nesta sede en 2024 e os alumnos e alumnas da Escola RC Deportivo 2024-25 teñen preferencia até o domingo 11 de maio. A partir do luns 12 liberaranse as prazas que queden libres.
Poden acollerse a descontos as nenas e nenos que participasen en edicións anteriores dos DéporCampus Cabreiroá e da Escola RC Deportivo; os socios ou accionistas do RC Deportivo; xogadores do Club; familias numerosas ou con máis dun membro en paro; familias que inscriban a máis dun fillo; e fillos e fillas de empregados de empresas colaboradoras de cada sede.
Toda a información sobre cada sede, cada quenda, horarios e demais preguntas frecuentes atópase en deporcampus.rcdeportivo.es, onde se pode realizar todo o proceso de inscrición e contacto, que tamén se pode establecer a través de deporcampus@rcdeportivo.es.
