Antonio Hidalgo manifestou na sala de prensa do Dépor Training Center que a enerxía que mostrou o equipo o pasado martes na Copa del Rey ante o Atlético de Madrid "témola que seguir mantendo sobre todo na nosa primeira liña de presión. Hai que ser sólidos, compactos. Iso tennos que marcar o camiño de recuperar esa solidez".
Advirte que este sábado 17 de xaneiro ás 21.00 horas (LaLiga TV Hypermotion e Fútbol 2, dispoñible en DIGI TV e outras plataformas) no UD Almería Stadium "temos que estar moi concentrados os 90 minutos. Por calquera detalle váiseche un partido. Iso é o que temos que incidir".
O técnico deportivista admite que a dinámica de puntos nas últimas xornadas "non é boa" aínda que cre que "o empate do outro día (en Las Palmas) ten un valor grande porque é ante un rival que está a loitar polo mesmo que nós".
Iso si, subliña que "temos que cortar esa xeira, ir a por os 3 puntos a Almería. Sería fundamental contra un rival da zona alta e daríanos ese plus de motivación para o futuro".
Finalmente Antonio Hidalgo avoga por "ser compactos desde a nosa primeira liña de presión porque faiche estar máis axustado, pechar máis por dentro"; e lembra que "ocasións clarísimas estamos a telas. É certo que necesitaremos máis volume".
